Het prieel der gheestelicker melodiie

[p. 108]

☞ Eenen nieuvven lof-sanck ter eeren Christus Passie.

VVY louen v kleyn ende groot,
Lof Iesus lief verheuen,
Die voor ons storft de bitter doot,
Daerom wy v aenkleuen:
Door v liefde ghepresen
Ghy hebt ghestort v bloet,
O Iesu Christe soet,
V doodt seer goet

[p. 109]

 

Die heeft ons al ghenesen.

 

Ghy hebt, etc.

 

Deur Adam waren wy besmet,

 

Soo dat wy moesten steruen:

 

Wy laghen doot onder de Wet,

 

Wy moesten al bederuen:

 

Maer (Iesu) wy verweuen

 

Deur v, leven, ghepresen.

 

Ghy hebt, etc.

 

Ghy daeldet uyt dijns Vaders Schoot

 

In een suyuer Kerssauwe,

 

Dat’s Maria schoon Roose root:

 

Wy zijn verlost uyt rauwe:

 

Dies segghen wy ghetrauwe,

 

Heer Iesus weert ghepresen.

 

Ghy hebt, etc.

 

V doot heeft ons d’leuen ghebrocht,

 

Ghy hebt sonder beswaren

 

Der menschen salicheyt gewrocht,

 

Doen wy verloren waren:

 

Dus wy v openbaeren

 

Thien duysent lof ghepresen.

 

Ghy hebt, etc.

 

Ghy zijt voor ons den Aduocaat,

 

Den peys die quaemt ghy maken:

 

Dies wy Iesus vroech ende laet

 

Naer v seer vierich haken,

 

Om by v te gheraken

 

In hemelrijck ghepresen.

 

Ghy hebt, etc.

 

Gy hebt ons voor een testament

 

Op de wereldt ghelaten

 

V vleesch en bloet seert excellent,

 

Om nutten t’onser baten:

[p. 110]

 

Wt rechter charitaten,

 

O Iesus lief ghepresen.

 

Ghy hebt, etc.

 

Op Prince hooch ghebenedijt,

 

Wilt onsen gheest verstercken,

 

Om u te louen t’aller tijdt,

 

Hier en in alle percken

 

Want groot zijn al v wercken

 

Die ghy doet weert gepresen.

 

Ghy hebt, etc.

Selden tijdt sonder strijdt.