Het prieel der gheestelicker melodiie



[pagina 99]
☞ Een ander, op de wijse: Alsoo ‘t beghint.
[pagina 100]
LAet ons al t’samen vrolijck leuen, Het hemels broot is ons ghegheuen, Der liefden schat is ons ontdaen: Suyuert v hert van t’sondich sneuen, Ontfanght Christus lichaem verheuen, En wilt tot sinder tafel gaen. Hy heeft ons al willen ghedincken, Met sijn vleesch ende bloet beschincken, Dus elck uyt rechte liefde claer Eet sijn vleesch, en sijn bloet vvilt drincken: Ghy sult in’t eeuwich leuen blincken, Daer eeuwich vreucht sal zijn voorwaer. Komt al ter Tafel Godts beraden, En wilt v gheestelick versaden, Want t’Lam Godts is voor ons ghedoot: Komt drinckt den wijn die deur ghenaden V sterckt, bevrijt voor alle schaden, Die Christus schenckt uyt liefde groot. Wien niet en nut Christus lichame Sal kommen in d’eeuwighe blame: Maer wien sijn lichaem nut seer reyn, Sal wesen voor Godt aenghename, Be-eruen oock zijn rijck’ eersame, Hier bouen in het hemels pleyn. Fondeert v hier op als de stercke, Alsoo v leert d’ Heylighe Kercke, Maer gheen ketters doch en ghelooft, Die anders leeren t’allen percke, En gaet daer op gheensins te wercke, Anders ghy wort gheheel verdooft. Selden tijdt sonder strijdt.