Princesse Liet-boec

Herculus antwoort tot Dianire [vertaling][editie]

Op de Stem: Ick weet een Vrouken Amoreus

Weet ghy niet dat der lieffden cracht
Alle menschen can bedwinghen
Venus heeft haer selfs ghewracht
Dat minne liedt te singhen /
Jupiter cant niet wederstaen /
Apollo cond'se niet weeren
Hy was met sware stucken belaen
Hoort mijn vermaen:
Wilt my niet schandaliseren.

Hoe comt dat ghy my nu veracht?
Ghy pleecht my eens te prijsen:
Mijn feyten vroom die ick heb gewracht
Ghinckt ghy u in verjolijsen
Nochtans heb ick ghetriumpheert
Al gaet ghy my dus blamen
Heb ick met een Vrou gheboeleert
Ghy my onteert
Met recht meucht u wel schamen.

Prince
Ghy Monsteren hoe groot en fel
Sy moesten voor my vluchten /
Maer ghy valsche Vrouwe rebel
Doet my stenen ende suchten /
Al was ick Omphale subjeckt
Sy ginck my dus niet plaghen
O moordadighe Vrouwe bevleckt /
Heel onperfeckt
Tot u Godt / moet ick het claghen.