Parnassus, dat is den Blijen-bergh
(1623)–Anoniem Parnassus, dat is den Blijen-bergh–
AuteursrechtvrijOp de wijse: Maer ten sal u niet, maer ten sal u niet.Laet ons nu loven ende prijsen
Godt den Heer ghebenedijt
Hy heeft in Annam laten rijsen
Allen deughden met jolijt
Anna matroon // heylich en schoon
Zijt mijn patronersse.
Van ’s Conincks saet was sy gheboren:
Vyt ’t gheslacht van Iuda jent
Haer vader Gazirus vercoren
Tot Bethleem was hy bekent. Anna etc.
| |
[pagina 62]
| |
Daer was een bloemken uytghelesen
Ioachim was sijnen naem,
Die moest den naem van Anna wesen,
Want hy was daer toe bequaem. Anna etc.
Sy deelden haer goet in dry parceelen;
D’een dat was alleen veur haer,
De arme hadden tweede deele,
T’derde veur den Tempel claer. Anna etc.
Sy leefden twintich jaer te samen
Man en vrouw seer heylighlijck,
Maer daer was een groote prame
Dat Anna was onvruchtbaerlijck. Anna etc.
Ioachim sou een feestdagh trecken
Om te doen sijn offrand’.
Hy hoorde spotten ende ghecken
Als sonder vrucht in’t Ioodtsche land. Anna etc.
Den opper priester sonder vraghen
Hem verstiet van Godts autaer,
Dat bitter lijden moest hy draghen,
Claeghdent sijnen ooghen swaer. Anna etc.
Maer d’Enghel Godts heur openbaerde
Daer hy by sijn schaepkens lagh
Den wille Godts hem daer verclaerde,
Wonder was datmen daer sagh. Anna etc.
Staet op o Ioachim sonder rouwe
Sprack den Enghel Godts veurwaer
En treckt weder nae u vrouwe,
Sy heeft oock een blijde maer. Anna etc.
De Heer heeft over langh gheweten
V verdriet en lijden groot,
Maer en heeft u niet vergheten
Noch verlaten inden noot. Anna etc.
Hy heeft verhoort u vierich suchten
En u vrou ghebenedijt,
Sy sal draghen een schoon vruchte
Blijschap veur die werelt wijt. Anna etc.
| |
[pagina 63]
| |
Maria sal den name wesen
Van dat kint seer excellent:
Godts moeder sal sy zijn ghepresen,
V droefheyt wort daer deur voleynt. Anna etc.
Als Ioachim hoorde dese woorden
Seer blijde is hy op ghestaen,
En met haesticheyt hem spoorden
Om seer vroech nae huys te ghaen. Anna etc.
Sy quamen bly en vrolijck t’samen
Ioachim en Anna vroet,
Sy heeft ontfanghen sonder ramen
En ghebaert een dochter soet. Anna etc.
De dochter is van grooter weerde,
Want Godts moeder sal sy zijn;
Den Heer van hemel en van eerde
Sal sy baeren sonder pijn. Anna etc.
O weerde vrouw seer hooch ghepresen
Met u lieve Dochter schoon
Bidt veur ons, op dat wy wesen
Mochten eens in ’s hemels troon. Anna etc.
Al is dit Liedeken slecht en rechte
Vyt liefden ist nochtans volindt,
Van eenen Minderbruer seer slechte,
Want hy Annam seer bemindt,
O Anna matroon // seer weert en schoon
Zijt toch mijn patronersse. Amen.
F.I.V.T. |
|