Parnassus, dat is den Blijen-bergh
(1623)–Anoniem Parnassus, dat is den Blijen-bergh–
AuteursrechtvrijOp de wijse: O Heer wanneewr sal comen.Ave der Maeghden croone,
Maria weest ghegroet,
Claer als de sonne schoone
Zijt ghy vol van gratien soet.
Deur u ons alle deught toevloet:
En ghy hebt met diep ootmoet
Ghebaert ons hoochste goet.
| |
[pagina 34]
| |
De Heere is met u reyne
O vrucht des werelts wijt;
Boven alle vrouwen alleyne
Zijt ghy ghebenedijt:
Want noyt mensch tot gheender tijt
Alsoo saligh als ghy zijt,
Soo verheven tot ‘svyants spijt.
Ghedanckt, ghelooft, ghepresen
Moet zijn den weerdighen pant,
V vrucht reyn uyt-ghelesen
Iesus ons Heer playsant,
Die ons als een Leeuw vaillant
Ghebroken heeft der hellen bant,
En ghebracht in’t Vaderlant.
O Maria hoogh gheboren,
Vyt Coninck Davids saet,
Bidt veur ons, die te voren
Verdoemt waeren in Godts raet,
Tot dat Iesus ons advocaet
Ons ghekomen is te baet,
En ghestelt in beteren staet.
Prince.
Lof, moeder der ghenaden,
Zy u in’t aertsche dal:
Wee hen die u versmaden
Der ketters valsch gheral.
Wilt ons van u vtanden al
Beschermen, en ontfanghen bal
Meest in des doodts gheval. Amen.
F.G.S.B. |
|