Ons Erfdeel. Jaargang 11

Suid-Afrikaans Engelse Poësie.

Daar word dikwels vergeet dat daar ook 'n Suid-Afrikaans Engelse letterkunde bestaan. In die reeks ‘Mededelings van die Universiteit van Suid-Afrika’ het onlangs 'n kritiese bloemlezing verskyn waarin 18 van die bekendste digters baie kortliks bespreek word.

‘South African poetry - a critical anthology’, saamgestel deur Prof. D.R. Beeton and W.D. Maxwell-Mahon bevat slegs een gedig van elke digter. Net in die geval van Roy Campbell, wat ook in die buiteland hoë aansien geniet, is drie gedigte en van Mary M. Webster twee gedigte oorgeneem.

Vroeëre uitgawes oor die Engelse letterkunde in die reeks sluit in Prof. C.J.D. Harvey se intreerede ‘Language, Literature and Criticism’ (1961), Prof. D.R. Beeton se intreerede ‘Aesthetics and Morality, with particular reference to English literature’ (1964), F.D. Sinclair se ‘A.E. Housman: an evaluation’ (1957) en ‘Three papers on tragedy’ (1960) en Prof. E. Davis se ‘Yeats's early contacts with French Poetry’ (1961).

Onder die publikasies oor Afrikaanse taal en letterkunde in die reeks is veral Prof. P. Brachin van die Sorbonne se referaat ‘Noord en Zuid: De literaire eenheid als probleem’⁽¹⁾ besondere vermelding werd. Ander publikasies is:

Steyn, J.L.: Die Gedig as Estetiese Voorwerp. 1958.

Posthumus, M.J.: Die Taak van die Taalkundige in Suid-Afrika. 1964:

Simposium: Die Digter oor sy Digproses. Referente: G. van N. Viljoen, J.W. Valkhoff, F.D. Sinclair en E. Botha. 1961:

Van der Merwe, H.J.J.M.: Die Prioriteit van die Kaapse Teks van Jan van Riebeeck se Daghregister. 1958.

Van der Merwe, H.J.J.M.: Belgies-Kongo; 'n Sosio-linguistiese Studie. 1960.

De Pauw, W.: De Vriendschap van Albert Verwey en Stefan George. 1960.

John Willemse

(1) Kyk O.E. 9(4)1966, p. 132.