Nieuwe Testament (Zuidnederlandse vertaling)

XVIII

Ende na desen sagic enen anderen

[fol. 257v]

ingel nederdalende vanden hemele, die grote mogentheit hadde ende derde wert verlicht van sijnre glorien, ende hi riep met starcker stemmen, seggende: Het es gevallen, het es gevallen die grote Babylon ende es worden een woeninge der duvele ende ene hoede elcs onreinen geests ende ene hoede elcs onreinen vogels ende hatelecs, want van den wine der gramscap harre oncuusscheit hebben gedronken alle heidene, ende de coninge der erden sijn met hare veroncuusschet, ende de coepliede der erden sijn rike worden vander cracht harre weldecheit.

Ende ic hoerde ene andere stemme vanden hemele seggen: Gaet ute van hare, mijn volc, op dat gi niet deilechtech en sijt harre mesdaden, ende van haren plagen niet en ontfaet. Want hare sonden sijn op comen al toten hemele ende de Here es herdacht harre ongerechtecheit. Gheldet hare alsoe si u gegouden hevet ende tweevoudecht hare twee\vout

[fol. 258r]

na hare werke in den dranke [In poculo quod miscuit, miscite illi duplum], diense mingde, mingt haer tweevout. Alsoe vele als si hare geeert heeft ende in welden was, alsoe vele gevet hare tormente ende weeninge. Want si seit in haer herte: Ic sitte coninghinne ende ic en ben niet weduwe ende ic en sal niet sien weeninge. Daeromme selen comen in enen dage hare plagen: de doot ende weeninge ende de honger, ende metten viere salse verberrent [werden], want God es staerc, diese ordeelen sal. Ende het selen weenen ende clagen [of screien] op hare de coninge der erden ende die met hare geoncuuscht sijn ende in welden geleeft hebben, ende alse si sien den roec hars brands verre staende om die vreese harre tormente, seggende: Wee, wee, wee dier groter stat Babylon, dier starcker stat, want in ene ure sal comen har ordeel ende de coepliede [negociatores] der erden selen weenen ende screyen over hare, want haren coep en coept niemen voertmeer: den coep gouts ende selvers ende precioser steene ende der margrieten ende des bissen

[fol. 258v]

ende purpure ende der syden ende der goutvaruwen [coccini] ende alle hout thyimini ende alle evorien vate ende alle vate van preciosen steennen ende eerne ende yserne ende marmorene, ende caneelle ende amonium ende anijs ende wel riekende wortelen ende der salven ende wieroecs ende wijns ende olyen ende poeder ende die gelike ende der taruwen ende der note ende der beesten, der scape ende der perde ende [et redarum et mancipiorum] der kerre of sleggen, ende der sielen der menscen ende de sielen der knechte. Ende dine begerlec appelle dijnre sielen sijn wech gegaen van die ende alle smaecachtege dinc ende voerbarege sijn van di verdorven, ende voertmeer en selen stappans die coepliede niet venden deser dinge; die rike worden sijn van hare, die selen van verren staen om de vreese harre tormente, bedroevende ende weenende [flentes], seggende: Wee wee dier groter stat, de welke omcleedt was met bysse ende purpure ende met gout varuwen [cocco] ende verguldet es van goude ende met preciosen steennen ende margrieten, want in ene ure sijn ontsettet alsel\ke

[fol. 259r]

rijcdoeme, ende elc stierman [gubernator] ende elc, die in verre lande sceept ende de scepliede ende die in de see wrachten, stonden verre ende riepen, siende de stat hars brands, seggende: Wie es gelijc deser groter stat? Ende si woerpen gemul op hare hoefde ende riepen weenende ende screyende ende seggende: Wee wee dier groter stat, in de welke rike worden sijn alle, die scepe hadden in de see, van haren prise, want in ene ure es si gewoest. Vervroudet op hare, hemel ende heilege apostelen ende propheten, want God hevet gevonnest u vonnesse van hare.

Ende een starc ingel hief op enen steen alse een groet molen steen ende senddene in de see, seggende: Met seker druust sal werden gesendt Babylon die grote stat, ende si en sal voertmeer niet werden vonden. Ende de stemme der harperen ende der musiken ende die sanc om die dode ende der tromppen en sal voertmeer in hare niet werden ghehoert, ende elc cunstmakere van iegeliker cunst en sal voertmeer in hare niet vonden werden, ende de stemme der mo\lene

[fol. 259v]

en sal voertmeer in hare niet gehoert werden ende dlicht der lanternen en sal di niet meer lichten ende de stemme des brudegoemen ende der bruut en sal noch niet in di werden gehoert, want dine coepliede waren de princen der erden, want in haren toeverien [in ueneficiis] hebben gedoelt alle heidene, ende in hare es vonden dbloet der propheten ende der heilegen ende alle dierre gedodet sijn in der erden.