Nieuwe Testament (Zuidnederlandse vertaling)

XV

Ende ic sach een ander groet teeken in den hemel ende wonderlec, VII ingele hebbende de VII leste plagen, want in hen so wert volbracht Gods toren,

ende ic sach alse ene glasene see, gemingt met viere ende hen, die de beeste verwonnen hadden ende haer beelde ende tgetal hars namen, staende op de glasine see, hebbende Gods harpe, ende singende Moyses sanc des knechts Gods, ende den sanc des lams, seggende: Groet ende wonderlec sijn dine werke, Here God almechtech, gerecht ende gewarech sijn

[fol. 254r]

dine wege, coninc der werelde. Wie en sal di niet vreesen, Here, ende dinen name groet maken? Want du best allene goedertieren, want alle heidene selen comen ende selen anebeden in dijn anscouwen, want dine vonnessen sijn oppenbaer.

Ende na desen sagic ende sich, de tempel des tabernakels des orcontscaeps wert ontdaen in den hemel, ende de VII ingele gingen ute vanden temple, hebbende de VII plagen, gecleedt met enen reinen blickenden steenne ende gegordet omtrent de borst met guldenen gordelen. Ende een vanden IV dieren gaf den VII ingelen VII guldene vioelen vol des torens Gods des levenden in de werelt der werelde. Ende de tempel wert vervult vanden roeke Gods majesteit ende van sijnre cracht, ende niemen en mochte ingaen in den tempel tote dat volbracht waren de VII plagen der VII ingle.