Nieuwe Testament (Zuidnederlandse vertaling)

XIII

Ende ic sach vander see op clemmen een bees\te,

[fol. 250v]

die hadde VII hoefde ende X hoerne ende op sine hoerene X dyademen ende op haer hoevede de namen der blasphemien. Ende de beeste, die ic sach, was gelijc pardus [pardus] ende haer voete alse des beeren voete, ende haer mont als des leeus mont, ende de drake gaf hare hare cracht ende grote mogentheit. Ende ic sach enen van sinen hoefden alse gedoodet in der doot, ende de wonde sijns doods wert geheelt ende al derde wert verwondert na dier beesten ende anebeedden den drake, want die der beesten de mogentheit gaf. Ende si anebeedden de beeste, seggende: Wie es gelijc deser beesten ende wie vermach te vechtene met hare? Ende haer wert gegeven een mont, sprekende grote dinge ende blasphemien, ende hem [hare] wert gegeven mogentheit dit te doene XLII maent. Ende het dede sinen mont op in blasphemien, Gode te blasphemerene sinen name ende sinen tabernakel ende hen, die in den hemel woenen, ende hem wert mogentheit gegeven strijt te makene metten heilegen ende hen te verwen\nenne

[fol. 251r]

ende te doodene, ende hem wert mogentheit gegeven in al den geslechten ende der erden ende den volke ende den tongen ende den heidenen. Ende si anebeeddene alle, die woenen in der erden, der welkere namen niet en sijn gescreven in dboec des levens lams, dat gedoodt es van begenne der werelt. Soe wie oeren heeft te hoerene, hi hore. Wie in tgevangenesse geleidet heeft, hi sal in tgevangenesse gaen ende die met den swerde doodet, hi moet metten swerde gedodet werden. Dit es de verduldecheit der heilegen ende tgeloeve.

Ende ic sach op clemmen een ander beeste vander erden ende hadde II hoerne gelijc des lams hoerne ende si sprac alse de drake. Ende si dede al de mogentheit der ierster beesten in sijn anscouwen ende dede de erde ende de woenende in hare de ierste beeste ane beden, wies doot wonde geheelt werdt, ende dede grote tekene, soe dat [ut in ignem faceret de celo descendere in terram] hi oec vier van den hemele dede neder comen in danscouwen der menscen ende dat hi verleidde de woenende in derde

[fol. 251v]

omme die tekene, die hem sijn gegeven te doene in der beesten anscouwene, seggende den genen die in der erden woenen, dat si een beelde maecten der beesten, die de wonde des swerds hadde ende levede. Ende hem wert gegeven, dat hi geven soude der beelden der beesten den geest ende dat dbeelde der beesten sprake ende maecte, dat so wie niet en anebeedde dat beelde der beesten, dat hi soude werden gedodet, ende dede alle cleine ende grote, rike ende arme, vrie ende knechte, te hebbene dat teeken in de rechte hant ochte in haren voerhoefden ende dat niemen en mochte coopen ochte vercoepen dan die hadde teeken ochte den name der beesten ochte de getale hars namen. Hier es wijsheit. Die verstennesse heeft, teekene die getale der beesten, want het es tgetal der menscen, ende har getal es VI^c ende LXVI.