Nieuwe Testament (Zuidnederlandse vertaling)

XII

Ende een groet teeken oppenbaerde in den hemel ende een wijf, gecleedt metter sonnen ende de mane onder hare voete ende in haer hoet een crone van XII sterren, ende in den lichame hebbende riep si gebarende ende si wert gepijnt, dat si gebaerde. Ende een ander teeken es gesien in den hemel, ende sich, een groet drake ende roet, hebbende VII hoefde ende X hoerne ende in sinen hoefden VII dyademen, ende sijn steert trac terdendeel der sterren des hemels ende sendese in derde, ende die drake stont vore dat wijf, die gebarende was, op dat hi, alse si <gebaert> hadde haren sone, dat hine verslinden soude. Ende si gebaerde enen sone, die man was, die rechten soude alle heidene met eere yseren

[fol. 249v]

roeden, ende hare sone wert getrocken te Gode ende te sinen troene, ende dat wijf vloe in de woestine, waer si heeft een stat, bereet van Gode, op dat sise voedde daer M CC ende LX dage.

Ende het es gesciet groet strijt in den hemel: Mechiel ende sine ingele streden met den drake, ende de drake vacht ende sine ingele, ende si en vermochten hen niet noch hare stat en wert nemmeer vonden in den hemel. Ende het es verwoerpen de drake,die grote oude slange, die geheten wert de duvel ende sathanas, die al de werelt verleidde, die wert gewoerpen in derde, ende sine ingele sijn met hem gesendet. Ende ic hoerde ene grote stemme in den hemel seggen: Nu es salecheit gemaect ende doget ende trike ons Gods ende de mogentheit sijns Christus, want de wroegere onser broedere es verwoerpen, diese wroegede voer danscouwen ons Gods dach ende nacht, ende si hebben hem verwonnen overmids dbloet des lams ende overmids dwoert sijns getugenessen ende si en minden niet hare sielen toter doot. Daeromme verblidet gi hemele

[fol. 250r]

ende die in hen woenen. Wee der erden ende der see, want de duvel ginc neder tot u, groten toren hebbende, wetende, dat hi lettel tijts heeft.

Ende nadien dat de drake sach, dat hi gewoerpen wert in derde, es hi den wive nagevolget, die den man gebaert hadde ende dien wive worden gegeven II vlogele eens groets aers, op dat si vliegen soude in de weldernesse in hare stat, daer si gevoedt werden soude enen tijt [per tempus et tempora] ende tide ende enen halven tijt van tserpens ansichte. Ende tserpent liet uut sinen monde na dwijf een water als een riviere, op dat se getrocken worde van der rivieren, ende de erde halp den wive ende derde dede haren mont op ende verswalch de riviere, die de drake liet van sinen monde, ende de drake wert vergramt in dwijf ende ginc wech enen strijt te makene metten anderen van haren sade, die Gods gebod hueden ende tgetugenesse Ihesus hebben, ende hi stont op tsendeken der see.