Nieuwe Testament (Zuidnederlandse vertaling)

XI

Ende mi wert een riet gegeven gelijc enen roedekene ende mi wert geseit: Stant op ende metet den tempel Gods, ende den outaer ende die in hem anebeden. Maer den vrijthof, die buten den tempel es, dien werpt ute, want hi es gegeven den heidenen, ende si selen de heilege stat verterden XLII maent. Ende ic sal geven mine twee getugen ende si selen propheteren MCC ende LX dage, gecledet met sacken. Dese sijn II olyve boeme ende twee candeleren, lichtende in sHeren anscouwene van der erden staende, ende so wie hen deren wilt, so sal een vier ute gaen van haren monde ende sal verslinden hare viande, ende so wie hen letten [quetsen] wilt, die moet also sterven [gedoodt werden]. Dese

[fol. 248r]

hebben macht te slutene den hemel, dat het niet en rechene in den dagen harre prophecien ende si hebben macht over de watere, die te verkeerne in bloede ende derde te slane met alreanden plagen also dicke als si willen selen, ende alse si volindet hebben hare getugenesse, so sal die beeste, de welke op clemt vanden afgronde, den strijt doen jegen hen ende salse verwinnen ende salse dooden, ende si selen hare lichamen werpen in der straten der groter stat, de welke geheten wert geestelec Sodoma ende Egyptus, daer hare Here gecruust werdt. Ende si selen werden gesien vanden volke ende vanden geslechten ende vanden heidenen ende vanden tongen hare lichamen III dage ende enen halven, ende haren lichamen en sal niet werden gedoeget, dat mense legge in den grave. Ende de woenende in der erden selen vervrouden ende werden verblijdt op hen ende onderlinge gaven senden, want dese II propheten hebben gepijnt hen, die woenen op der erden. Ende na III dage ende enen halven so quam de geest des levens van Gode in hen ende si ston\den

[fol. 248v]

op hare voete, ende grote vrese viel op hen, die se sagen. Ende si hoerden ene grote stemme van den hemele hen seggen: Clemt hier op, ende si clommen op in den hemel in den wolken ende hare viande sagense. Ende in diere uren es gesciet grote ertbevinge ende dat tiendendeel der groter stat viel, ende in der ertbevingen worden gedoodt VII^M namen der menscen, ende dandere worden geset [gelaten] in vresen ende si gaven glorie Gode des hemels.

Dander wee verginc ende sich, dat derde wee sal vollec comen.

Ende de sevende ingel blies metter businen ende het worden gemaect grote stemmen in den hemel, seggende: Dat rike deser werelt es worden ons Gods ende sijns Christus, ende hi sal regneren in de werelt der werelde. Amen. Ende de XXIV ouders, die in den anscouwene Gods sitten in haer sittene, vielen in hare anscine ende anebeedden Gode, seggende: Amen. Wi doen di dancke, Here God almechtech, die es ende die was ende die toecomende es, die dine grote cracht naems ende regneres ende de heidene wordens vergramt, ende dine gramscap quam toe ende de tijt der doodere te ordeelne

[fol. 249r]

ende den loen te gevene dinen knechten den propheten ende den heilegen ende <die> dinen name ontsien, den cleinen ende den groten, ende te verdervenne [exterminandi] degene, die derterike gecorrumpeert hebben.

Ende het wert op gedaen de tempel Gods des Heren in den hemel, ende het wert gesien de arke sijns testaments in sinen tempel, ende het worden gemaect blixemen ende stemmen ende dondere ende ertbevinge ende grothagel.