Nieuwe Testament (Zuidnederlandse vertaling)

VII

Na desen sagic IV ingele staende op de IV hoerecke der erden, houdende de IV wende der erden, dat si niet en waeyden op derde noch op de see noch in negeene boeme. Ende ic sach enen anderen ingel op clemmen vanden opgange der sonnen, hebbende des levende Gods teken, ende hi riep met eere groter stemmen den IV ingelen, den welken gegeven es te derne der erden ende der see, seggende: En wilt niet deeren der erden noch der see noch den boemen, tote dat wi getekenen de knechte ons Gods in haren voerhoefden. Ende ic hoerde tgetal der getekendere c ende XLIV^M, getekent uut al den geslechten der sonen van Israhel.

Uten geslechte van Juda XII^M getekent,

Ute Rubens geslechte XII^M getekent,

Ute Gads geslechte XII^M getekent,

[fol. 243r]

Ute Asors geslechte XII^M getekent,

Ute Neptalims geslechte XII^M getekent,

Ute Manasses geslechte XII^M getekent,

Ute Symeons geslechte XII^M getekent,

Ute Levi geslechte XII^M getekent,

Ute Ysachars geslechte XII^M getekent,

Ute Zabulons geslechte XII^M getekent,

Ute Josephs geslechte XII^M getekent,

Ute Benjamins geslechte XII^M getekent.

Na desen sagic ene grote scare, welke niemen ghetellen en mochte, uut allen heidenen ende gheslechten ende volken ende tongen, staende voer den throen Gods in slams anscouwene, gecleedt met witten stoelen ende palmen in haren handen, ende riepen met groter stemmen seggende: Salecheit onsen Gode, <den> sittenden op den throene, ende den lamme. Ende alle ingele stonden in den ommeringe des throens ende der ouderen ende der IV diere ende si vielen in des throens anscouwene in hare ansichten ende anebeedden Gode, seggende: Amen. Benedixie ende claerheit ende wijsheit ende werke van dancke ende eere ende doecht ende staercheit

[fol. 243v]

onsen Gode ende den lamme in de werelt der werelden sonder gebrec. Amen. Ende een vanden ouderen antwerdde mi, seggende: Dese, die gecleedt sijn met witten stoelen, wie sijnse ende wanen sijnse comen? Ende ic seide hem: Here mi, du wetes. Ende hi seide mi: Dese sijn die comen sijn van groten tribulatien ende stride, ende hebben hare stoelen gedwegen ende hen wit ghemaect in slams bloet. Daeromme sijnse vore den throen Gods ende dienen hem dach ende nacht in sinen tempel, ende die op den throen sit, woent over hen. Ende hen en hongert noch en dorst niet meer, noch de sonne en valt op hen noch negeene hitte, want dlam, die in de middelt des throens es, regeert hen ende geleidtse toter fonteinen des levens waters, ende God sal afwasschen allen traen van haren oghen.