Nieuwe Testament (Zuidnederlandse vertaling)

VIII

Ende alse hi opgedaen hadde den sevenden segel, so wert stilnesse gemaect in den hemel alse een halve ure lanc. Ende ic sach VII ingele staende in Gods anscouwene, ende hen

[fol. 244r]

worden gegeven VII businen.

Ende sich een ander ingel quam ende stont voer den guldenen outaer, die voer Gods anscouwen es, hebbende een gulden wieroec vat in sijn hant, ende hem wert gegeven vele wieroecs, op dat hi geven soude van alle den gebeden alle heilegen op den guldenen outaer, die voer Gods throen es, ende de roec des wieroecs ginc op vanden gebede der heilegen vander hant des ingels vor Gode. Ende de ingel nam dat gulden wieroec vat ende vulde dat vanden viere des outaers ende sendet in derde, ende het sijn gesciet stemmen ende dondere ende blixemen ende grote ertbevingen.

Ende de VII ingele, die de VII businen hadden, bereidden hen, dat si blasen souden.

Ende de ierste ingel blies metter businen ende het gesciede hagel ende vier in bloede gemingt ende es gesonden in der erden, ende terdendeel der erden wert verberrent ende terdendeel der boeme wert verberrent, ende alle groen hoy wert verberrent.

Ende de ander ingel blies metter [inder] businen, ende als een groet berch viers berrende wert gesonden in de see, ende terdendeel der see wert

[fol. 244v]

bloet ende terdendeel der creaturen, die sielen hadden in de see, storven, ende terdendeel der scepe ginc onder.

Ende de derde ingel blies metter businen, ende het viel ende grote sterre vanden hemele, berrende als een wisch [of walm], ende viel in terdendeel der rivieren ende in de fonteinen der watere, ende de name der sterren wert geseit Absinthium [alsene], ende terdendeel der watere wert better oft absinthium [alsene] ende vele menscen sijn doot vanden wateren, want si alte better worden sijn.

Ende de vierde ingel blies metter businen ende terdendeel der sonnen wert geslegen ende terdendeel der manen ende terdendeel der sterren, alsoe dat haer derdendeel verdonkert wert, op dat si niet en souden lichten terdendeel sdachs ende snachs gelikeleke.

Ende ic sach ende hoerde een stemme eens vliegenden aers, die vloech midden dor den hemel, seggende met groter stemmen: We, wee, wee den woenenden in derde vanden anderen drien ingelen stemmen der businen, die noch blasen selen metten businen

[fol. 245r]

.