Nieuwe Testament (Zuidnederlandse vertaling)

VIII

Maer het es gesciet in dien dagen grote persecucie inder kerken, die te Iherusalem was, ende alle de jongeren sijn gesceden biden conincrike van Judeen ende van

[fol. 188r]

Samarien sonder de apostele. Maer vresechtege manne begroeven Stevene ende daden groet geween over hem. Maer Saulus devasteerde of persequeerde de kerke bi husen ende ingaende trac hi manne ende wive in gevangenesse.

Hieromme die gesceden waren, overleden ewangelizeerende dwoert Gods. Maer Philips nedercomende in ene stat van Samarien, predecte hi hen Christum. Maer die scaren waren erenstech te dien, die van Philipse geseit worden ende eendrechtechlec hoerende ende siende de tekene, de welke hi dede. Want vele harre, die den onreinen geest hadden, roepende met groter stemmen wordense verloest, ende vele gichtege ende cropele worden genesen. Hieromme es gemaect grote vroude in dier stat.

Maer eenrande man met namen Symon, die te voren hadde geweest in de stat toeverare, dese verleidde tfolc van Samarien, seggende hem sijnde eenrande groet prophete, den welken si alle hoerden, vanden mensten toten meesten, seggende: Dese es de cracht Gods, welke groet geheten werdt, maer si aendachten hem, om dat hise vele tijts bedwelmt hadde met siere gookelien. Ende doe si Philipse geloeft hadden, die hen ewangelizeerde

[fol. 188v]

vanden rike Gods, worden manne ende wive gedoept inden name ons Heren Ihesu Christi. Ende doe geloefde Symon oec, ende doe hi gedoept was, so hinc [of hielt] hi ane Philipse, ende oec siende die tekene ende die alre meeste crachte, die gescieden, verwonderde hi hem al verwonderende.

Maer doe de apostelen, die te Iherusalem waren, verhoert hadden dat Samarien dwaert Gods ontfaen hadde, soe sonden si tote hen Petere ende Janne, die, doe si comen waren, soe baden si voer hen, dat si den heilegen geest ontfaen souden. Want noch en was hi in negeenen van hen lieden comen, maer allene waren si gedoept in sHeren Ihesus name. Doe leiden si de hande op hen ende si ontfingen den heilegen geest. Maer doe Symon sach, want de heilege geest gegeven wert bi den in leggene der hande der apostele, brachte hi hen tgelt, seggende: Geeft mi dese macht, dat op so wien dat ic de hande legge, den heilegen geest ontfaen moge. Maer Peter seide tote hem: Dijn gelt si met di in verliese, want du waens Gods gichte met gelde besitten. Di en es negeen deel noch lot deser redenen, want dijn herte en es niet rechte vore Gode. Alsus doe penitencie van deser dine quaetheit ende bidde Gode ocht di bi avonturen mach werden verlaten dit

[fol. 189r]

gepeys dijnre herten, want ic sie dattu sijs in gallen der bitterheiden ende in bande der quaetheit. Maer Symon seide antwerdende: Bidt gi voer mi te Gode, op dat niet van dien, dat gi geseit hebdt, op mi en come.

Ende seker die gene getugeden ende spraken sHeren woert ende keerden weder te Iherusalem ende ewangelizeerden of predecten vele conincriken der Samaritane.

Maer de ingel des Heren sprac tote Philipse, seggende: Stant op ende ganc jegen tsuden ten wege, die nederdaelt van Iherusalem in Gazam, dat es de weldernesse. Ende op staende ginc hi wech. Ende sich, een man, een machtech gelubdt man Candacen, der coninginnen van Ethyopen, die boven al haren scat was, hi was comen beden in Iherusalem, ende hi keerde weder, sittende op sinen wagen ende lesende Ysayam den prophete. Maer de geest seide Philipse: Ganc voert ende nake desen wagene. Philips liep toe ende hoerde hem lesen Ysayam den prophete ende seide: Waenstu dattu verstaes dattu lees? Die seide: Ende hoe soudict mogen verstaen, en ware ocht mi niet yemen getoent en hadde? Ende hi bat Philipse, dat hi op den wagen quame ende sate met hem. Maer de stat der screfturen, die hi las, was dit: Alsoe een scaep, dat geleidt es te doodene ende alse een lam vore dengenen, diet sceert sonder stemme, alsoe en ontdede hi sinen mont niet

[fol. 189v]

. In oetmoedecheiden es sijn vonnesse onderbracht, maer wie mach sijn geslechte vertellen? Want men sal sijn leven wech doen vanden lande.

Maer de gelubde man seide, antwerdende Philipse: Ic bidde di: van welken prophete seit hi dat? Van hem ochte van enegen anderen? Maer Philips, op doende sinen mont ende begennende van desen ewangelizeerde hi hem Ihesum. Ende doe si voeren, quamen si tot eenrande watere, ende de gelubde man seide: Sich water. Wie verbiedt mi gedoept te werdene? Maer Philips seide: Eest dat du uut al dijnre herten geloefs, so machment doen. Ende de enuchus seide antwerdende: Ic geloeve dat Ihesus Christus Gods sone es. Ende hi hiet den wagen staen. Ende si gingen beide neder int dwater, Philips ende de gelubde man, ende hi doeptene. Maer doe si afgegaen waren vanden watere, so begreep sHeren ingel Philippusse, ende de gelubde en sach hem niet meer, want hi voer wech sinen wech verblidende. Maer Philips es vonden in Azoten, ende dore lidende ewangelizeerde hi alle den steden, tote dat hi quam te Cesarien.