Nieuwe Testament (Zuidnederlandse vertaling)

VI

Maer in dien dagen wies dat getal der jongeren ende het es gesciet murmureeringe der Grieke jegen die Ebreeussce, om dat hare weduwen worden veronwerdt in den dageleken dienste. Maer die XII riepen te gadere die menechte der jongeren ende seiden: En es niet recht, dat wi laten Gods waert ende ten tafelen dienen. Hieromme bruedere, merct onder u VII manne van goeden

[fol. 183v]

getuge vol des heilechs geests ende wijsheiden, de welke wi setten mogen over dit werc, maer wi selen erenstech sijn in bedingen ende in den dienste des waerts. Ende dese redene genoegede vore alle die menechte. Ende si cosen Stevenne, enen man vol des geloefs ende sheilechs geests, ende Philipse ende Procorum ende Nichanorem ende Tymotheeuse ende Permenam ende Clase, enen incomelinc van Anthiocien. Dese settense vore der apostele anscouwene ende bedende leiden si de hande op hen.

Ende sHeren waert wies, ende tgetal der jongeren menechfoldechde sere in Iherusalem, ende een grote scare vanden papen was oec onderdaen den geloeve.

Maer Steven, vol gracien ende stercheiden, <dede> grote teekene ende wondere in den volke. Maer het stonden op enege uter synagogen, die geheten waren Libertine ende Cyrenensce ende Alexandrine ende vanden genen, die waren van Cecylien, ende van Asyen, ende disputeerden met Stevene, ende si en mochten niet wederstaen der wijsheit ende den geest die sprac, om dat si van hem berespt worden met alre betrouwenessen. Hier omme alse si niet wederstaen en mochten der waerheit,

[fol. 184r]

doe sondense voert [submiserunt] manne, die hem seggen souden, dat si hem hadden hoeren seggen waerde van blasphemien in Moyssesse ende Gode. Ende alsoe beroerden si tfolc ende de ouders ende de scriben, ende tegadere loepende begrepense hem ende settene in der consilien ende si setten valsche orconden, die seiden: Dese mensce en houdt niet op te sprekene waerde jegen de heilege stat ende de wet, want wi hoerden hem seggen:

Want Ihesus Nazarenus dese sal destrueren dese stat ende sal verwandelen de settingen [of wet], die ons Moyses gesetet [of gelevert] heeft. Ende si sagen hem alle, die in de consilie saten [ende] si sagen sijn ansichte alse eens ingels ansichte.