Nieuwe Testament (Zuidnederlandse vertaling)

Hier beghint sente Pauwels [ander] epistole ad tessalonicenses

I

Pauwels ende Silvaen ende Thymotheus ontbieden der kerken van Tessalonicensen in Gode onsen

[fol. 110v]

vader ende in onsen Here Ihesu Christo, dat u si gracie ende vrede van Gode onsen vader ende van onsen Here Ihesu Christo.

Bruedere, wi sijn sculdech Gode te dankene altoes voer u also alst recht es, want u geloeve overwast ende uwe minne overvloyt elken van u allen toten anderen, also dat wi selve in u glorieren in den kerken Gods om uwe geduldecheit ende geloeve in allen uwen tribulacien ende uwen persecucien, die gi gedoecht in exemple des gerechts ordeels Gods, dat gi werdech gehouden werdt in trike Gods, om dwelke gi oec lijdt, ocht dan recht es voer Gode, vergeldinge te wedergevene dien, die u pinen, ende u, die gepijnt werdt, werdt raste met ons inder oppenbaringen ons Heren Ihesu Christi vanden hemele met den ingelen sijnre doget inder vlammen des viers, die de wrake geven sal over die, die Gode niet bekint en hebben ende niet gehoersam en sijn den ewangelio ons Heren Ihesu Christi, die oec geven sal ewege pinen in verderfenessen van den anscine ons Heren ende vander glorien sijnre macht, alse hi comt te glorificeerne in sinen heilegen ende wonderlec te sine in alle, die geloeven in onsen Here Ihesum Christum, want onse getuge heeft geloeft gheweest over u in dien dage, in den welken wi oec altoes vore u bidden, dat onse God gewerdege u te roepene in sijnre roepingen ende dat hi vervulle alle den wille sijnre

[fol. 111r]

goetheit ende dwerc des geloeven in goeder cracht, op dat de name ons Heren Ihesu Christi in u verclaert werde ende gi in hem na der gracien ons Gods ende des Heren Ihesu Christi.

II

Bruedere, wi bidden u bi der toecomst ons Heren Ihesu Christi ende onser vergaderingen in hem, dat gi niet haestelec beruert en werdt van uwen sinne ende dat gi u niet en vervaert, noch bi geeste, noch bi sermoene, noch bi epistelen als van ons gesonden als ochte sHeren dach jegewerdech ware. Dat u niemen en verleide in eneger manieren, want het en si dat tiersten come enege contrarie of gedeiltheit ende de mensce der sunden, de sone der verlorenheit, geoppenbaert werde, die contrarie es ende verheven werdt boven al dat God geseit werdt ocht dat hi geoefent werdt, alsoe dat hi sitten sal in den tempel Gods, hem selven toenende als ocht hi selve God ware. En hebdi niet onthouden, doe ic noch met u was, dat ic u dese dinge seide? Ende [et nunc quid detineat scitis] nu wat hi houden sal weetti, dat hi geoppenbaert sal werden in sijnre tijt. Want de dienst der quaetheit werdt nu gewracht, allene [tantum ut qui tenet nunc, teneat donec de medio fiat] dat de ghene die thoudt nu sal houden, tote dat hi van der middewert werde wech ghedaen, ende dan sal geoppenbaert werden de gene ongenedege, den welken onse Here Ihesus doden sal in den geeste

[fol. 111v]

sijns monds ende sal destrueren in der verlichtingen sijnre toecomst hem, wies toecomst es na Sathanas werkinge in alre cracht ende in teekenen ende logenleken wonderen ende in alre bedriechnessen der ongerechtecheit, dien die vervaren, om datse niet ontfaen en hebben de caritate der waerheit Christi, op datse behouden worden. Ende daeromme sal hen God sinden de werkinge der dolingen, op datse der logenen geloeven ende datse alle geordeelt werden, die der waerheit niet geloeft en hebben, maer geconcenteert hebben der ongerechtecheit.

Gheminde bruedere van Gode, wi sijn sculdech altoes gracien te doene vor u, om dat ons God ierstwerf uut vercoren heeft in salecheiden ende in heilegingen des geests, in geloeve der waerheit, in den welken hi u oec geroepen heeft bi onsen ewangeliume in vercrigingen der glorien ons Heren Ihesu Christi. Ende alsus, bruedere, staet ende houdt de settingen, de welke gi geleert hebdt, weder het si bi sermoene ocht bi onser epistelen.

Maer hi, onse Here Ihesus Christus, ende God, onse vader, die ons gemint heeft ende gegeven ewege troestinge ende goeden hope in gracien, hi troeste uwe herten ende gesterke in allen goeden werken ende in goeden sermoene.

[fol. 112r]

III

Voertane, bruedere, bidt vore ons, opdat de redene Gods loepe ende verclaert werde aloveral alsoet oec bi u es, ende op dat wi gevrijt werden van den onbequameleken ende quaden menscen, want tgeloeve en es niet alre menscen. Maer God es getrouwe, die u ghesterken sal ende behueden van quade. Wi betrouwen van u in onsen Here, want die dinge, die wi geboden hebben, die hebdi gedaen ende doet ende doen selt. Maer de Here moet beleiden uwe herten ende uwe lichamen in der minnen Gods ende in der gedoechsamheit Christi.

Bruedere, wi vercundegen u inden name ons Heren Ihesu Christi, dat gi u ave trect van elken brueder, die onordelec wandelt ende niet na der settingen, die si ontfaen hebben van ons. Want gi selve wet, hoe dat behoerlec es ons te volgene, want wi en hebben niet onrastelec geweest onder u ende en hebben dbroot van niemene te vergeefs geten, maer in arbeite ende in moetheiden, nacht ende dach werkende om dat wi niemene van u beswaren en souden, niet als ocht wi geene macht gehadt en hadden, maer dat wi u ons selven geven souden teenre formen om ons te volgene. Want doe wi bi u waren, doe vercundechden wi u dit: want so wie niet en wilt

[fol. 112v]

werken, die en ete niet. Maer wi hebben gehoert onder u somege, die onrastelec wandelen, niet werkende, maer curioeselec doende. Dese, die alselc sijn, vercundegen wi ende bemanen in den Here Ihesu Christo, datse met geswige werkende hare broot eten. Maer gi, bruedere, en wilt niet gebreken wel te doene. Maer so wie niet gehoersam en es onsen woerden bi der epistelen, dien merct, ende met hem en werdt niet vermingt, op dat hi confuus werde, ende en wiltene niet achten alse viant, maer beresptene alse uwen brueder.

Ende God des vreden, hi moet u geven ewegen vrede in allen steden. De Here si met u allen. Amen.

Mine groete si in de hant Pauli, de welke een teeken es in elken epistelen alsic scrive. De gracie ons Heren Ihesu Christi si met u allen. Amen.

Hier es Sente Paulus ander epistele uut tot dien van Tessalonien.

Een argument op depistole ad Thymotheum.

Tymotheeuse instrueert hi ende leert vander ordenancien des <bisscopdoems> ende des dyakenscaeps ende vander ordenancien alle der kerkeleker leringen, hem scrivende vander stat van Roeme.

Hier es ute dargement.