Nieuwe Testament (Zuidnederlandse vertaling)

IV

Maer alse Ihesus bekinde, want de Pharisei horden dat Ihesus meer jongheren maect ende doept dan Jan - ende Ihesus en doepte niet allene, maer sine jongheren - doe liet hi Judeam ende ghinc af anderwerf in Galileam. Maer hem behorde over te lidene dore midden Samarien. Daeromme quam hi in de stat van Samaryen, die Sychar hetet, neven den bemt, dien Jacob gaf Joseph sinen sone, ende daer was Jacobs borne. Ende Ihesus, vermoedet vanden weghe, sat aldus op den borne, het was omtrent die seste ure. Een wijf van Samarya quam sceppen water. Ihesus seide hare:

[fol. 198r]

Ghef mi drinken. Want sine jongheren waren af gegaen in de stat, op datse spise cochten. Daeromme seide hem dat wijf, die Samaritane: Hoe eische di drinken van mi, als ghi een Jode sijt, de welke ben een wijf Samaritane, want de Joden en orboren niet die Samaritane. Ihesus antwerde ende seide hare: Waert dattu wistes die gave Gods ende wie dat es, die sprect: Ghef mi drinken, du hads lichte gheeischet van hem ende hi hadde di ghegheven levende water. Dwijf seide hem: Here, du en heves niet, waer in sceppen ende de putte es diepe. Wanen hebdi daeromme levende water? Want du en best niet meerre dan onse vader Jacob, die ons den putte gaf, ende hi dranc ute hem ende sine sonen ende sine beesten. Ihesus antwerde hare ende sprac: Elc die drinket van desen watere, sal dorsten anderwerf, maer wie drinket vanden watere dat ic hem gheve, en sal niet dorsten in ewecheit, maer dat water dat ic hem gheve, sal werden in hem een borne springhens waters in dat eweghe leven. Dat wijf seide te hem: Here, ghevet mi dat water, op dat mi niet en dorste noch herwert

[fol. 198v]

en come sceppen. Ihesus seide hare: Gaet, roept uwen man ende comt herwert. Dat wijf antwerde ende seide: Icken hebbe neghenen man. Ihesus seide hare: Wel seidi: Want icken hebbe neghenen man, want v manne hebdi ghehadt ende dese welken du hebs en es dijn man niet. Dat seiddi waerleke. Dat wijf seide hem: Here, ic sie want du best profete. Onse vadere ane beedden in desen berghe ende ghi segghet, want Iherusalem es de stat, daer men anebeden moet. Ihesus seide hare: Wijf, gheloevet mi, want die stonde sal comen, wanneer ghi den vader noch in desen berghe noch in Iherusalem anebeden en selt. Ghi anebedet dat ghi niet en wet, wi ane beden dat wi weten, want de salecheit es uten Joden, maer de ure comt ende es nu, wanneer de ghewareghe anebederen den vader ane beden selen in den gheeste ende in der waerheit, want ende de vader soeket alselke die hem anebeden. God es gheest ende dien die hem anebeden selen, behoret in den gheeste ende in der waerheit te ane bedene. Dat wijf seide hem: Ic weet, want

[fol. 199r]

Messyas comt, die gheseghet werdet Christus. Daer omme, alse die comen sal, sal hi condeghen alle dinc. Ihesus seide hare: Ic beent, die spreke metti.

Ende tehant quamen sine jongheren ende si wonderden, want hi metten wive sprac. Nochtan en seide nieman: Wat soecti? ochte: Wat sprecti met hare? Daeromme liet dat wijf hare cruke ende ghinc af in de stat ende seide dien menschen: Comt ende siet den mensche, die mi seide alle dinc de welke ic dede. En es hi niet Christus? Ende si ghinghen ute van der stat ende quamen te hem.

Hierenbinnen baden hem sine jongheren segghende: Rabbi, etet. Ende hi seide hen: Ic hebbe spise tetene, de welke ghi niet en wet. Daer omme spraken de jongheren onderlinghe: En hevet hem iemen niet bracht tetene? Ihesus seide hen: Mine spise es, dat ic doe sinen wille, die mi sendde, dat ic volbringhe sijn werc. En segdi niet, dat noch IV maende sijn ende de oechst comt? Sich, ic segghe u: Heft op uwe oghen ende siet de conincriken, want si sijn te hans wit ten oechste. Ende die snidet, nemt <loen> ende vergadert vrocht in dat eweghe leven, op\dat

[fol. 199v]

ende die saeit ende die snidet te gadere verblide. Want in dien es dat woert waer: Want een ander es, die saeit, ende een ander es, die snijdt. Ic sendde u sniden dat ghi niet en aerbeitet, andere hebbent gheaerbeitet, ende ghi sijt in ghegaen in hare aerbeite.

Ende vele der Samaritane ute diere stat gheloefden in hem omme dwoert dies wijfs ghetughe ghevende: Want hi seide mi alle dinc, welke ic dede. Daeromme alse die Samaritane quamen te hem, baden si hem, dat hi daer bleve, ende hi bleef daer II daghe. Ende vele meer gheloefdere om sine sermone in hem ende seiden den wive: Want te hant en gheloeve wi niet om dine sprake, want wi selve horden ende wi weten, want dese es waerleke de behoudere der werelt.

Na twe daghe ghinc hi ute van daer ende ghinc in Galileam, want hi, Ihesus, gaf ghetughe, want de profete en hevet ghene eere in sinen vader lande. Daeromme alse hi quam in Galileam, utenamenne die Galileeuse alse si alle dinc saghen, de welke hi ghedaen hadde te Iherusalem in\

[fol. 200r]

den feeste daghe, want ende si quamen ten feeste daghe.

Daeromme anderwerf quam hi in Chana Galilee, daer hi water maecte wijn. Ende het was erehande conincsken, wies sone siec was te Capharnaum. Alse dese horde want Ihesus soude toe comen in Galilea van Judea, ghinc hi te hem ende bat hem, dat hi soude nedercomen ende ghenesen sinen sone, want hi began te stervene. Daeromme seide Ihesus te hem: Ghi en gheloevet niet, het en si dat ghi tekene ende wondere siet. Dat conincsken seide te hem: Here, gaet neder eer dan mijn sone sterve. Ihesus seide hem: Gaet, dijn sone levet. Die mensche gheloevede den sermone dat hem Ihesus seide, ende ghinc. Ende staphans hem nedergaende liepen hem jeghen knechte ende boedscaepten hem, seggende want sijn sone levede. Daeromme vraghede hi de ure van hen, in welker hi bat hadde, ende si seiden hem: Want ghisteren in der sevender uren liet hem de rede. Daeromme bekinde de vader want dat de ure was, in welkere Ihesus seide: Dijn sone levet, ende hi gheloefde ende al sijn huus. Dat ander teken dede Ihesus, alse hi anderwerf quam van Judea in Galileam

[fol. 200v]

.