Nieuwe Testament (Zuidnederlandse vertaling)

II

Het was een mensche uten <Phariseen> met namen Nichodemus, een prince der Joden. Dese quam snachts te Ihesum ende seide hem: Rabbi, wi weten, want ghi van Gode comen sijt meester, want niemen en mach dese tekene doen, die du does, God en ware met hem. Ihesus antwerde ende seide hem: Amen, amen segghic di, so wie niet herboren en werdet anderwerven, en mach trike Gods niet sien. Nichodemus seide te hem: Hoe mach de mensche herboren werden, alse hi out es? Hine mach niet in siere moeder buc anderwerven in gaen ende herboren werden? Ihesus antwerde: Amen, amen seggic di, sowie niet herboren en werdet uten watere ende den heileghen gheeste, en mach niet ingaen intrike Gods. Dat gheboren es uten

[fol. 196r]

vleesche, es vleesch, ende dat gheboren es uten gheeste, es gheest. Niet en wondert, want ic di seide: U behoevet te werdenne geboren anderwerven. De gheest gheestet, waer hi wilt, ende sine stemme hordi, maer ghine wet, wanen hi comt ochte werwert hi gheet, also es ieghewelc, die gheboren es uten gheeste. Nichodemus antwerde ende seide hem: Hoe moghen dese dinghe gheschien? Ihesus antwerde ende seide hem: Du best meester in Israhel, ende en bekindi dese dinghe niet? Amen, amen segghic di: Want wat wi weten, spreken wi ende wat wi sien ghetughen wi, ende onse ghetughe en ontfadi niet. Ochte ic u segghe erdsche ende ghijs niet en gheloevet, hoe soudi gheloeven, ochtic u seide hemelsche? Ende nieman en gheet op in den hemel dan die nederghinc van den hemele, smenschen sone, die es in den hemel.

Ende also Moyses tserpent hoghede in de woestine, also behoret smenschen sone ghehoghet te werdene, op dat ieghewelc, die in hem gheloevet, niet en verderve, maer

[fol. 196v]

hebbe dat eweghe leven. Want alsoe minde God de werelt, op dat hi gave sinen eenghebornen sone, op dat ieghewelc, die in hem gheloevet, niet en verderve, maer hebbe dat eweghe leven. Want God en sendde niet sinen sone in de werelt, op dat hi ordeelde de werelt, maer op dat de werelt behouden worde overmids hem. Die in hem gheloevet, en sal niet werden gheordelet, maer die niet en gheloevet, es te hans gheordelet, want hi niet en gheloevet in den name dies eengheborens soens Gods. Dat es dat ordeel, want dlicht es comen in de werelt ende de menschen minden meer de demsternesse dan dlicht, want hare werke waren quaet. Want ieghewelc, die quaet doet, hatet licht ende en comt niet ten lichte, op dat sine werke niet berespet en werden, maer die waerheit werket, hi comt ten lichte, op dat sine werke werden gheopenbaert, want si sijn in Gode ghewracht.

Na desen quam Ihesus ende sine jongheren in dlant van Judea ende derwert bleef hi met hen ende hi doepte. Ende Jan was doepende

[fol. 197r]

in Enon neven Salim, want derwert waren vele watere, ende si quamen ende worden ghedoept. Noch doe en was Jan niet ghesendet in den kerkere.

Daeromme es ghemaect ene vraghe ute Jans jongheren metten Joden vander suveringhen. Ende si quamen te Janne ende seiden hem: Rabbi, die met di was over de Jordane, den welken du getughe gaves, siet hier die doepet ende si comen alle te hem. Jan antwerde ende seide: De mensche en mach niet ontfaen het en si, dat hem ghegheven si vanden hemele. Ghi selve ghevet mi getughe, dat ic seide: Icken ben niet Christus, maer want ic gesendet ben vore hem. Die ene bruud hevet, es brudegoem, maer dies brudegoemen vrient, die steet ende hem horet, hi verblidet van bliscapen omme de stemme dies brudegoems. Daeromme es mine bliscap vervult in dien hem behoret te wassene, maer mi te menderne.

Die van hoghen comt, es boven alle, die vander erden es, hi sprect vander erden. Die vanden hemele comt, es boven alle, ende dat hi sach ende horde, dat ghetughet hi ende nie\men

[fol. 197v]

en ontfeet sijn ghetughe. Maer wie sijn ghetuge ontfinghe, betekende, want God es waerachtech. Want den welken God sendde, hi sprect Gods woerde, want God en ghevet niet den gheest te maten. De vader mint den sone ende gaf hem alle dinc in sine hant. Die gheloevet in den sone, hevet deweghe leven, maer die ongheloevende es den sone, en sal deweghe leven niet sien, maer de abolghe Gods blivet op hem.