Nieuwe Testament (Zuidnederlandse vertaling)

II

Ende dies derds daghes sijn brulochte ghemaect in Chana Galilee, ende daer was Ihesus moeder, maer Ihesus es gheroepen ende sine jongheren ter brulocht. Ende den wijn ghebrekende seide Ihesus moeder te hem: Sine hebben ghenen wijn. Ende Ihesus seide hare: Wat mi ende di, wijf? Mine ure en quam noch niet. Sijn moeder seide den dienaren: Soe

[fol. 194v]

wat hi u seghet, doet. Daer waren gheset VI steinen cruken na de suveringhe der Joden, elke begripende twevuldeghe mate ochte drievuldeghe. Ihesus seide hen: Vult de cruken met watre. Ende si vuldense toten oversten. Ende Ihesus seide hen: Scept mi ende draghet den archytriclino. Si droeghen. Maer doe archytriclinus ghesmaecte dwater wijn ghemaect, ende niet en wiste wa\nent was, maer die diennaren, die dwater sciepen, wistent, archytriclinus roept den brudegoem ende seide hem: Elc mensche set ten iersten goeden wijn ende alse si dronken worden sijn, dan dat daer argher es, maer du heves ghehouden den goeden wijn tote noch.

Dat beghen der tekene dede Ihesus in Chana Galilee ende openbaerde sine glorie, ende sine jongheren gheloefden in hem.

Na desen ghinc hi neder te Capharnaum, hi ende sijn moeder ende sine bruedere ende sine jongheren, ende daer blevense niet vele daghe.

Ende het was bider Joden Paschen ende Ihesus ghinc op te Iherusalem. Ende hi vant in den tempel vercopende scape ende ossen

[fol. 195r]

ende duven ende wisseleren sittende. Ende alse hi gemaect hadde alse ene gheesele van seelkennen, warp hise alle uten temple, scape ende ossen, ende hi goet ute der wisseleren ghelt ende de tafelen keerde hi omme. Ende hi seide dien, die de duven vercochten: Draghet wech dese van hier, ende en wilt niet maken mijns vader huus een huus der coemescap. Maer doe ghedachten sine jongheren, want het es ghescreven: De minne dijns huus hevet mi gheten. Daeromme antwerden de Joden ende seiden hem: Wat tekene toendi ons, want ghi dese doet? Ende Ihesus antwerde ende seide hen: Ontbendet desen tempel ende in III daghen salickene verwecken. Daeromme seiden de Joden: XLVI jaer es ghesticht dese tempel ende soudi hem in III daghen verwecken? Maer hi seide vanden temple sijns lichamen. Daeromme, doe hi op verstont van den doden, sijn sine jongheren ghedinkende worden, dat hi dat seide van sinen lichame, ende si gheloefden der screfturen ende sinen redenen, de welke Ihesus seide.

Doe hi was te Iherusalem in den feestedage,

[fol. 195v]

, in den Paschen, gheloefdenre vele in sinen name, siende sine tekene, de welke hi dede, maer hi, Ihesus, en gheloofde hen hem selven niet, om dat hise alle kinde, ende want hem niet noet en was, op dat ieman ghetughe gave vanden mensche, want hi wiste wat dat was in den mensche.