Nieuwe Testament (Zuidnederlandse vertaling)

XXIV

Ende in enen saterdaghe herde tileke quamen die wijf ten grave, bringende die crude die si bereet hadden. Ende si vonden den steen ghedaen vanden grave, ende in gaende en vonden si niet den lichame ons Heren

[fol. 189r]

Ihesus. Ende het es gheschiet, alsi waren staende dinkende van desen dinghen, siet, II manne stonden bi hen in blickende cledere. Ende alse hen ontsaghen ende neigheden dansichte in derde, seidense te hen: Wat suecti den levenden metten doden? Hine es hier niet, hi es op verstaen. Ghedinct, hoe hi u sprekende es alse hi noch was in Galilea, segghende: Want het behoert smenschen sone ghelevert te werdene in de hande der sonderen ende ghecruust te werdene ende dies derds daghes op te verstane. Ende si sijn ghedinkende siere woerde ende keerden weder van den grave ende boetscaepten dit den XI ende alden anderen. Maer dit was Maria Magdalena, ende Johanne, ende Maria, Jacobs moeder, ende die andere, die met hen waren, die dit seiden den apostelen. Ende dese woerde dochten hen alse droeme ende sine gheloefdens hen niet. Ende Peter stont op ende liep ten grave. Ende hi lach over tgraf ende sach die linene cledere allene daer liggen. Ende hi ghinc wech, wonderende met hem wat

[fol. 189v]

daer gheschiet was.

Ende siet, II manne ute hen ghinghen in dien daghe in enen casteel, die was omtrent LX stadien van Iherusalem, de welke hiet Emaus, ende si spraken onderlinghe van al dien dinghen, die daer gheschiet waren. Ende het es gheschiet, alsi also spraken ende vragheden onder hen, naecte hen Ihesus ende ghinc met hen. Maer hare oghen worden ghehouden, dat sine niet en kinden. Ende hi seide te hen: Wat sijn de redenen, die ghi sprect onderlinghe ende ghi sijt droeve? Ende deen antwerde, dies name was Cleophas ende seide hem: Du best allene een pelgrijm in Iherusalem, ende en bekindi niet wat dinghe daer gheschiet sijn in desen daghen? Ende Ihesus seide: Wat dinge? Ende si seiden van Ihesum Nazarenum, die was een man, een profete, mechtech in werken ende in redenen vore Gode ende vore al de liede, ende hoe dattene die overste priesteren ende onse princen ghelevert hebben in die doemenesse der doot, ende hebben\ne

[fol. 190r]

ghecruust. Ende wi hoepten, dat hi verloest soude hebben Israhel. Ende nu over al dit eest heden die derde dach, dat dit gheschiede. Maer selke wive ute ons vervaerden ons, die vore den lichte waren ten grave, ende alsi niet en vonden sinen lichame, quamen si ende seiden dat si saghen een visioen van inghelen, die segghenne levende. Ende selke uten onsen ghinghen ten grave ende si vondent also de wive gheseghet hadden, ende si envo ndenne wareleke niet. Ende hi seide te hen: O sotte ende traghe van herten te gheloevene in al die dinghe, die ghesproken sijn van den profeten! En heboerde Christum dit niet te doeghene ende also te comene in sine glorie? Ende hi begonste van Moysesse ende van al den profeten hen te bediedene in al die screfturen, die van hem waren.

Ende si naecten den casteele, daer si ghinghen, ende hi sette hem vordere te gane. Ende si dwonghenne ende seiden: Blijft met ons, want het naect den avonde ende die dach es saen gheneighet. Ende hi ghinc in met hen. Ende het es gheschiet, alse

[fol. 190v]

hi was gheseten ten etene met hen, nam hi broet ende ghebenediet ende braect ende gaeft hen. Ende hare oghen sijn ontploken ende si bekindenne, ende hi ontvoer hen ute haren oghen. Ende si seiden onderlinghe: En was onse herte niet berrende in ons, alse hi sprac in den wege ende hi ons openbaerde die screfture?

Ende op staende te diere uren sijnse ghegaen in Iherusalem, ende si vonden vergadert die XI, ende die met hen waren, seiden: Onse Here es wareleke op verstaen ende hi hevet hem gheopenbaert Symone. Ende si vertelden, hoe hen gheschiet was in den weghe ende hoe sine bekinden in den brekene des broeds.

Ende alsi dit spraken, stont Ihesus in midden hen ende hi seide hen: Vrede si met u. Ic beent, en wilt u niet ontsien. Ende si worden vervaert ende ontset ende waenden enen gheest ghesien hebben. Ende hi seide hen: Wat sidi vervaert ende laet ghepeise comen in uwe herte? Siet mine hande ende mine voete, want ic beent; tast ende siet, want de gheest en heeft vleesch noch been al\so

[fol. 191r]

ghi mi siet hebben. Ende alse hi dit gheseghet hadde, toende hi hen hande ende voete. Ende alsi noch niet en wouden gheloeven ende hen wonderde van vrouden, seide hi: Hebdi iet dat men eten mach? Ende si brachten hem een stucke ghebradens veschs ende ene honech rate. Ende alse hi vore hen gheten hadde, nam hi dat relijf ende gaeft hen.

Ende hi seide te hen: Dit sijn die waerde die ic sprac te u, doe ic noch met u was, want het es noet, dat vervult werden alle die dinc die ghescreven sijn in Moyses wet ende in die profeten ende in die salme van mi. Doe openbaerde hi hen den sen, dat si verstaen mochten de screfture. Ende hi seide hen: Want aldus es ghescreven ende aldus moeste Christus doeghen ende op verstaen vanden doden dies derds daghes, ende ghepredect te werdene in sinen name penitentie ende verlatenesse der sonden in al den lieden, beghennende van Iherusalem. Ende ghi sijt deser dinc ghetughe. Ende ic sal senden mijns vader ghelof in u. Ende sit ghi in de stat to\te

[fol. 191v]

dat ghi ane wert ghedaen metter cracht van boven.

Ende hi leidese ute buten in Bethanien ende sine hande op gheheven ghebenedide hise. Ende het es gheschiet, alse hise ghebenedijt hadde, schiet hi van hen ende wert ghedreghen in den hemel. Ende si sijn weder ghegaen in Iherusalem, bedende met groter bliscap, ende si waren altoes in den tempel, Gode lovende ende ghebenediende.