Nieuwe Testament (Zuidnederlandse vertaling)

XVII

Ende hi seide te sinen jongheren: Het es onmoghelec, dat de scanden niet en comen, maer wee dien, bi wien datse comen! Het ware hem beter, dat een molen steen worde ghecnocht ane sinen hals ende hi ware gheworpen in de see, dan dat hi scandelizeerde enen van desen mensten. Wacht u, ochte dijn brueder sondecht in di, scheltenne ende ochte hijs penitencie doet, verghevet hem. Ende ochte hi sevenwerf in den dach sondecht in di ende hi sevenwerf in den dach bekeert wert te di, segghende: Het berout mi, verghevet hem.

Ende die apostelen seiden te onsen Here: Meerret ons tgheloeve. Ende onse Here seide: Waert dat ghi gheloeve hadt alse een senpsaet ende ghi seidt te desen moerbome: Wert ontwortelt ende wert gheplant over de see, hi soude u ghehorsam sijn.

Maer welc uwer hevet enen knecht eriende ochte scape wachtende, alse hi comt vanden velde, seghet hi hem te hant: Com, ganc sitten eten? En seghet hi hem niet: Bereidet mi dat ic eten sal, ende gordt u ende diene mi tote dat ic gheten hebbe ende ghedronken

[fol. 171v]

, ende daer na selstu eten ende drinken? En hevet hi niet gracie te dien knecht, want hi dede dat hi hem gheboet? Ic wane neen hi. Alsoe daer omme: alse ghi selt hebben ghedaen al dat u geboden es, so segghet: Wi sijn onnutte knechte; dat wi sculdech waren te doene, hebben wi ghedaen.

Ende het es gheschiet, alse Ihesus soude gaen in Iherusalem, leet hi dore die middelt van Samarien ende van Galilee. Ende alse hi soude gaen in enen casteel, quamen hem jeghen gheloepen X laserse manne, die stonden van verren ende hieven op hare stemmen ende seiden: Ihesus, ghebiedere, ontfarme di onser! Ende alse Ihesus sach, seide hi: Gaet ende toent u den priesteren. Ende het es gheschiet, alsi souden gaen, sijn si ghesuvert. Ende een ute hen, alse hi sach, dat hi ghesuvert was, es hi weder ghekeert, met groter stemmen Gode lovende, ende hi viel in sijn ansichte vor Ihesus voete, hem gracie doende. Ende dese was een Samaritaen. Ende Ihesus seide antwerdende: En esser niet X ghesuvert? Ende waer sijn de IX? Daer en es gheen vonden, die weder keerde

[fol. 172r]

ende gaf Gode glorie dan dese vremde. Ende hi seide hem: Staet op, gaet, want dijn gheloeve hevet di behouden ghemaect.

Ende Ihesus wert ghevraghet vanden Phariseusen: Weltijt comt dat rike Gods? Ende hi seide hen antwerdende: Dat rike Gods en comt niet met wachtene, noch sine selen niet spreken: Siet hier, ochte: Siet daer, want dat rike Gods es in u.

Ende hi seide te sinen jongheren: Die daghe selen comen, dat ghi selt begheren te siene enen dach smenschen sone, ende ghine seltene niet sien. Ende si selen u segghen: Siet hier, ende: Siet daer! Maer en wiltere niet gaen noch en volghet hen niet. Want also der blixemen schijn van onder den hemel in die dinghe, die onder den hemel sijn, blicket, also sal sijn smenschen sone in sinen dach. Maer tiersten behoert hem vele te doghene ende weder proevet te werdene van deser gheboerten. Ende alsoet gheschiet es in den daghen Noe, also saelt sijn in den daghen smenschen soens: si aten ende si dronken ende si leidden wive ende men gafse te huweleke tote in dien daghe, dat Noe ghinc in die arke, ende doe quam die deluvie ende verdrancse alle. Ghelijc alsoe gheschiet es in den dagen

[fol. 172v]

Loths: si aten ende dronken ende cochten ende vercochten, si planten ende stichten, ende op dien dach, dat Loth ute ghinc van Sodomis, rechende de Here vier ende solfer vanden hemele ende verderfse alle. Des ghelijc saelt sijn op den dach, dat smenschen sone sal werden gheoppenbaert. Die in dien daghe sal sijn in den dake ende sine vate in huus, hine sal niet neder comen, die te nemene, ende die in den velde es, dies ghelike en sal niet weder keren achterwert. Sijt dan ghedinkende van Loths wive! Sowie suect sine siele behouden te makene, hi salse verliesen, ende diese verliest om mi, hi salse levende maken. Ic segghe u, in dien nachte selen II sijn in een bedde, die een sal werden ghenomen ende die ander ghelaten. Si II selen sijn malende in een, die ene sal werden ghenomen ende die andere ghelaten, II in den velde, die een sal werden ghenomen ende die ander ghelaten. Ende si antwerden ende seiden hem: Here, waer? Die seide hen: Waer de lichame sal sijn, daer selen vergadert werden oec de are.