Nieuwe Testament (Zuidnederlandse vertaling)

XVI

Ende hi seide te sinen jongheren: Eerehande mensche was rike, die hadde enen ontfanghere van sinen goede. Ende dese wert verniemaert vore sinen here alse dat hi over hadde ghedaen sijns heren goet. Ende hi riepene ende seide te hem: Wat horic dit van di? Gef redene van dinen ontfanghe, want du en moghes te hanst niet

meer ontfaen. Ende die ontfenghere seide in hem selven: Wat salic doen, dat mijn here nemt van mi den ontfanc? Icken mach niet graven, ende ic scame mi te biddene. Ic weet wel, wat ic doen sal, datse mi ontfaen in hare huse, alse ic ben ghedaen van minen ontfanghe. Ende hi riep alle die sculderen sijns heren ende hi seide den iersten: Hoe vele bestu sculdech minen here? Ende die ghene seide: C vate olyen. Ende hi seide hem: Nemt dinen brief ende sittet haesteleke ende scrijf L. Daer na seide hi ten anderen: Hoe vele bestu sculdech? Die seide: C maten taruwen. Ende hi seide hem: Nemt dine letteren ende scrijf LXXX. Ende de here lovede dien ontfanghere van siere quaetheit,

[fol. 169v]

want hi vroedeleke hadde ghedaen, want die kindere deser werelt sijn vroeder in harre gheboerten dan die kindere des lichts.

Ende ic segghe u: Maect u vriende vanden goede der quaetheit, alse ghi selt ghebreken, dat si u ontfaen in die eweghe tabernacule.

Die ghetrouwe es in den mensten, hi es ghetrouwe in den meerren. Ende die in lettelen es quaet, hi es quaet in den meerren. Daeromme ochte ghi dan in dat quade ghelt niet en waert ghetrouwe, dat ghewarech es, wie saels u gheloeven? Ende ochte ghi in vremden goede niet en waert ghetrouwe, dat uwe es, wie saelt u gheven?

Niemen en mach tween heren dienen, ochte hi sal den enen hebben in hate ende den anderen minnen, ochte ane dat een cleven ende dat ander versmaden. Ghi en moghet Gode niet dienen ende Mammone. Maer al dit horden die Phariseuse, die ghierech waren, ende si bescherendenne. Ende hi seide hen: Ghi sijt, die u gherechtech maect vore de menschen, maer God bekint uwe herten. Want dat den mensche hoghe es, dat es on\werdech

[fol. 170r]

vore Gode.

Die wet ende die profeten tote Janne, van dien gheewangelizeert wert dat rike Gods, ende elc doet cracht in dat. Ende het es lichtere den hemel ende de erde te vergane dan ene titel van der wet te vallene.

Elc, die sijn wijf laet ende ene andere leidet, hi kevesschet, ende die de ghelatene van den man leidet, hi kevesschet.

Eerehande mensche was rike ende cleedde hem met purpure ende met bysso, ende hi at dagheleke blickende spise. Ende het was eerehande bedelere, die Lasarus hiet, die lach te siere dore vol sweren ende begherde ghesaedt te werdene van den crumen, die vielen van des rikes tafelen, ende niemen en gaffer hem, maer de honde quamen ende lecten sine sweren. Ende het es gheschiet, dat die bedelere sterf ende wert ghedraghen van den inghelen in Abrahams scoet. Maer die rike es doot ende es begraven in de helle. Ende hi hief op sine oghen, alse hi was in dien torment, ende sach Abrahame van verren ende Lasaruse in sinen scoet. Ende hi riep ende seide: Vader Abraham,

[fol. 170v]

ontfarme mijns ende sendet Lasaruse, dat hi nette duterste van sinen vinghere in water ende hi coele mine tonghe, want ic werde ghequelt in dese vlamme. Ende Abraham seide hem: Sone, ghedinct dat ghijt goet hadt in dinen levene ende Lasarus dies ghelike quaet, maer nu wert hi ghetroest ende du waerleke getorment. Ende in allen desen es ghestedecht een groet middel tusschen ons ende u, dat die van hier te u wouden gaen, sine mochten, noch die van daer hier. Ende hi seide: Daeromme biddic di, vader, dattune sendes in mijns vader huus, want ic hebbe V bruedere, dat hi hen segghe, datse niet en comen in dese stat van tormente. Ende Abraham seide hem: Si hebben Moysen ende de profeten, horen hen. Ende hi seide: Neen, vader Abraham, want dat yemen op stonde van der doot ende quame te hen, si souden penitentie doen. Ende hi seide hem: Eest datse Moysen ende die profeten niet en horen, alwaert dat yemen op stonde vander doot, sine souden hem niet gheloeven.

[fol. 171r]