|
| |
VI
Ende het es ghesciet in den anderen saterdaghe, alse hi ierst wert overlidende dore coren, plucten sine jongheren are, wrivende metten handen ende aten. Ende selke der Phariseuse seiden hen: Wat doedi dat niet gheorlovet en es in den saterdaghe? Ende Ihesus seide te hen antwerdende: En hebdi niet ghelesen, wat David dede alse hi hongher hadde ende die met hem waren? Hoe hi ghinc in Gods huus ende nam de broede der vore legghingen ende at ende gaf dien, die met hem waren, de welke niet gheorlovet en wa\ren
| |
| |
tetene dan allene den priesteren? Ende hi seide hen: Want smenschen sone es here oec dies saterdaghes.
Ende het es gheschiet in den anderen saterdaghe, dat hi soude gaen in de synagoge ende leren. Ende daer was een mensche ende sine rechte hant was droeghe. Ende de scriben ende de Pharisei wachten, ochte hi in den saterdaghe soude ghenesen, op datse sake vonden, daer sine af wroeghen mochten. Maer hi wiste hare ghepeise ende seide den mensche, die de droeghe hant hadde: Staet op ende staet in midden. Ende opstaende stont hi. Ende doe seide Ihesus te hen: Ic vraghe u, eest gheorloeft op den saterdach wel te doene ochte qualec, sielen te behoudene ochte te verliesene? Ende alse hi omme hadde ghesien, seide hi den mensche: Recket ute dine hant. Ende hi reckese ute ende sine hant es weder ghegeven in ghesonden. Ende si sijn vervult van onwijsheiden ende si spraken onderlinghe, wat si met hem doen mochten.
Ende het es ghesciet
| |
| |
in dien daghen, dat hi ute ghinc in den berghe beden ende was vernachtende in der bedinghen Gods. Ende alst dach ghemaect was, riep hi sine jongheren ende coesser XII ute hen, die hi apostelen noemde: Symone, dien hi toe naemde Petere, ende Andriese sinen brueder, Jacoppe ende Janne, Philipse ende Bertholomeuse, Matheuse, Thomasse, Jacoppe Alphei ende Symone, die hetet Zelotes, Judasse Jacobi ende Judasse Scarioth, die verradere was. Ende nedergaende met hen van den berghe stont hi in de stat des veldes ende ene scare siere jongheren, ende ene grote menechte volcs van al Judea ende van Iherusalem ende van der see ende van Tyri ende van Sydonien die quamen, datsine souden horen ende datsi souden werden gheganst van haren qualen, ende die ghepijnt waren van onsuveren gheesten worden gheganst. Ende alle die scaren sochtenne te tastene, want cracht ghinc ute van hem ende hi ghenasse alle.
Ende hi hief op de oghen in sine
| |
| |
jonghers ende seide: Salech sidi, arme, want Gods rike es uwe. Salech sidi, dien nu honghert, want ghi selt sat werden. Salech sidi, die nu weent, want ghi selt lachen. Salech seldi werden, alse u de menschen haten ende alsi u selen scheden ende si u verwiten ende utewerpen uwen name over quaet omme smenschen sone.
Verblijdt in dien daghe ende verhoghet, want siet, uwes loens es vele in den hemel, want dies ghelike daden de propheten haren vaderen.
Nochtan, wee u riken, die hebt u solaes. Wee u, die versadet sijt, want ghi selt hongher hebben. Wee u, die nu lacht, want ghi selt weenen ende droeve sijn. Wee alse u alle de menschen ghebenedien selen, also daden den propheten hare vadere.
Maer ic segghe u, diet horet: Mint uwe viande ende doet hen wel, die u haten, ende benedijt die ghene, die u vermaledien, ende biddet vore die ghene, die u quaet doen. Ende die di sleet
| |
| |
in ene kinnebacke, biedet hem dandere, ende den ghenen, die di nemt dine cledere, en verbiedet hem niet te nemene dinen roc. Ende alle, die di eyschen, gheeft hen, ende die di nemt dinghe, die dine sijn, en wiltse niet weder eyscen. Ende also ghi wilt, dat u de menschen doen, dies ghelike doet hen ghi. Ende ochte ghi die mint, die u minnen, welc es uwe gracie? Want die sonderen minnen die, die hen minnen. Ende ochte ghi wel doet den ghenen, die u wel doen, welc es uwe gracie? Want dat doen de sonderen. Ende ochte ghi ghichten ghevet, daer ghi af hopet weder te nemene, welc es uwe gracie? Want die sonderen leennen den sonderen, op dat si dies ghelike weder ontfaen. Nochtan mint uwe viande ende doet hen wel ende ghevet gichten, niet daer af hopende weder te hebbene, ende uwes loens wert vele ende ghi selt sijn sonen dies alre hoechstes, want hi ghenadech es op de ondanckeleke ende op de quade.
Daeromme sijt ontfaermhertech also u vader ontfaermhertech
| |
| |
es. En wilt niet ordelen, ende ghi en selt niet werden gheordeelt. En wilt niet doemen, ende ghi en selt niet werden ghedoemt, verghevet, ende u sal werden vergheven. Ghevet, ende u sal werden ghegheven, ene goede mate ende ene volle ende ene toeghedouwene ende ene overvloeyende selense gheven in uwen scoet. Want metter selver maten, dat ghi metet, salmen u weder meten.
Ende hi seide hen een gelikenesse: Daer de blende den blenden leidet, en vallense niet beide in de gracht?
De jonghere en es niet boven den meester, maer elc sal volmaect sijn alse hi es alse sijn meester.
Maer wat siestu een caf in dijns brueder oghe, ende den balke, die in dine oghe es, en mercstu niet? Ochte hoe moghestu ghesegghen dinen brueder: Brueder, ghedoeghet, ic sal ute werpen dat caf van dijnre oghen, ende niet en merckestu den balke in dine oghe? Ypocriten, doet tierst den balke ute dijnre oghen ende dan selstu sien, dattu dat caf does ute dijns brueder oge.
Want de boem en es niet goet, die quade vrocht
| |
| |
maect, noch de boem en es niet quaet, die goede vrocht maect. Want elc boem werdt bekint bi siere vrocht. Want sine gaderen niet van den doernen vighen, noch van den speldoerne en plucken si niet enen wijndruef. De goede mensche bringhet goet voert vanden goede scatte siere herten ende de quade mensche bringhet quaet voert van den quaden scatte siere herten. Want ute der overvloyinghen des herten sprect de mont.
Maer wat heeti mi Here, Here, ende niet en doet dat ic segghe? Elc, die comt te mi ende horet mine sermone ende doetse, ic sal u toenen, wien hi ghelijc es. Hi es gelijc enen mensche, stichtende een huus ende die groef ende leide dat fondament op enen steen. Ende alse ghemaect es ene overvloedeghe vloet, esse hortende ane dat huus ende sine mocht niet berueren, want het was ghefonderet op enen steen. Maer diese horet ende niet en doet, es ghelijc enen mensche, stichtende sijn huus op de erde sonder fondament, in welken de vloet hortende es ende het viel haesteleke, ende de val dies huus es groet ghemaect.
| |
| |
|
|
Auteursrechtelijk beschermd