Nieuwe Testament (Zuidnederlandse vertaling)

IV

Ende Ihesus, vol dies heilechs gheests, es weder ghekeret vander Jordanen ende wert ghewracht van den gheeste inder woestinen XI daghe, ende wert becoert vanden duvel.

Ende hi en at niet in dien daghen, ende die volbracht hongherde hem. Ende de duvel seide hem: Eest dattu Gods sone best, segghe desen steenne, dat hi broet werde. Ende Ihesus antwerdde hem: Het es ghescreven, dat niet in den broede allene de mensche en levet, maer in allen woerden Gods.

Ende de duvel voerdene op enen hoeghen berch ende toende hem alle de riken der werelt der erden in enen nu der tijt ende seide hem: Ic sal di alle dese moghentheit gheven ende dese glorie, want si es mi ghegeven, ende wien ic wille ghevicse. Eest dattu neder valles ende anebedes vore mi, so salse di al onderdanech sijn. Ende Ihesus seide hem

[fol. 134v]

antwerdende: Het es ghescreven: Den Here dinen God saltu anebeden ende hem allene saltu dienen.

Ende de duvel voerdenne in Iherusalem ende settenne op de pignacule dies tempels ende seide hem: Eest dattu Gods sone best, laet u neder vallen van achter, want het es ghescreven, dat hi gheboet sinen inghelen van di, dat si di behoeden in allen dinen weghen. Want in de hande selense di wech doen, dattu masschien dinen voet niet en stoets toe den steenne. Ende Ihesus seide hem antwerdende: Het es gheseghet: Du en sels niet becoren den Here, dinen God.

Ende alle de temptacien volbracht schiet die duvel van hem tote enen tide.

Ende Ihesus es weder ghekeret in viertute dies gheests in Galilee. Ende die niemare ghinc ute over al dat rike van hem. Ende hi leerde in hare synagoge, ende hi wert groet ghemaect van hen allen.

Ende hi quam te Nazareth, daer hi ghevoedt was, ende hi ghinc na sine ghewoente op den saterdach in de synagoge ende hi stont op lesen. Ende hem es ghegheven de boec Ysa\yas

[fol. 135r]

des propheten, ende alse hi omme keerde dat boec, vant hi de stat, daer ghescreven was: Die gheest Gods ons Heren op mi, daeromme hevet hi mi ghesalft, te ewangelizeerne de arme sendde hi mi ende te ganssene die droeve herten, te predekene den ghevanghenen verloessinghe ende den blenden ghesichte, te latene die ghequetste in verloessinghe, te predekene sHeren ontfenckeleke jaer ende den dach van weder loene.

Ende alse hi loec den boec, gaf hine enen dienere ende sat. Ende de oghen van hen allen, die waren in die synagoge, waren merkende in hem. Ende hi begonste te seggene te hen: Heden es vervult dese screfture in uwe oeren. Ende si gavens hem alle orconde ende wonderden in die woerde van gracien, die ute sinen monde ghinghen, ende si seiden: En es dit niet Josephs sone? Ende hi seide hen: Mi seldi segghen dese ghelikenesse: Visikere, ghenese di selven! Ende si seiden: Hoe vele wi hoerden ghesciede in Capharnaum, doet hier in

[fol. 135v]

dinen vaderlande. Ende Ihesus seide: Amen seggic u, dat negheen prophete en es ontfaen in sijn lant. Noch segghic u in waerheiden, vele weduwen waren in Helyas daghen dies propheten in Israhel, alse die hemel was beloken III jaer ende VI maent, als groet hongher was in al dat lant, ende te gheenre en es Helyas ghesendet dan in Sarepta Sydone te dien wive, dier weduwen. Ende vele laserse waren in Israhel onder Helyseo den prophete ende negheen harre en es ghesuvert dan Naaman Syrus. Ende alle sijnse vervult met toerne, die in de synagoge waren dit horende. Ende si stonden op ende jaghedenne uter stat ende leiddenne op thoechste van enen berghe, op den welken hare stat was ghemaect, om hem neder te werpene. Ende hi overlidende ghinc mids dore hen.

Ende hi ghinc neder in Capharnaum, de stat Galilee, ende daer leerde hise dies saterdaghes. Ende si gruwelden hen in siere leren, want sijn waert was in machte. Ende in de synagoge

[fol. 136r]

was een mensche, hebbende enen onsuveren duvel, ende hi riep ute met groeter stemmen segghende: Laet, wat ons ende di, Ihesus van Nazareth? Sidi comen, ons te verliesenne? Want ic weet dattu best de heileghe Gods. Ende Ihesus scoutenne segghende: Verstomme ende ganc ute van hem. Ende alsene de duvel ghewoerpen hadde in midden, ghinc hi ute van hem ende en scaedde hem niet. Ende in hen allen es ghemaect ancst ende si spraken onderlinge segghende: Wat es dat woert? Want in mogentheiden ende in viertute ghebiedet hi den onsuveren gheesten ende si gaen ute. Ende de fame van hem wert ghebreidt in elker stat dies conincs rijcs.

Ende opstaende Ihesus vander synagogen ghinc hi in Symons huus. Ende Symons swegher wert ghehouden van groten reden ende si baden [hem] vore hare. Ende hi stont over hare ende hi gheboet den rede, ende hi lietse. Ende te hant opstaende dienese hen.

Ende alse die sonne onder was, alle die sieke hadden van messeleken siecheiden, leidden sise te hem. Ende hi de\de

[fol. 136v]

ane hen allen sine hande ende ganssesse alle. Ende die viande scieden van velen, roepende ende segghende: Want du best Gods sone. Ende scheldende en liet hise niet spreken, want si wisten wel, dat hi Christus was.

Ende alst dach was, ghinc hi ute in die woeste stat. Ende die scaren sochtenne ende quamen te hem ende woudenne houden, dat hi niet scheden en soude van hen. Ten welken Ihesus seide: Te anderen steden behoert mi oec te ewangelizeerne dat rike Gods, want daeromme benic ghesonden. Ende hi was predekende inde synagogen van Galilee.