Nieuwe Testament (Zuidnederlandse vertaling)

III

Ende in den vijftienden jare der regnacien dies keysers Tyberius, procurerende Pontio Pylato Judea, ende Herodes tetrarcha Galilee ende Philippus sijn brueder tetrarcha Yturee ende dat conincrike Trachonidis ende Lisania Abiline tetrarcha, onder die princen der priesteren Anna ende Caypha, es gheschiet dwoert Gods over Janne, Zacharias sone, in die woestine. Ende hi quam in aldat conincrike der Jorda\nen,

[fol. 132r]

predekende [dat] doepsel der penitencien in verlatenessen der sonden, alsoe ghescreven es in den boec der sermone Ysayas des propheten: Stemme dies roependen in der woestinen: Ghereidet den wech ons Heren, maect rechte sine pade. Elc dal sal vervult werden ende elc berch ende hovel sal ghenedert werden, ende die quade selen berecht werden, ende scaerpe dinghe in pleine weghe, ende al vleesch sal sien die salecheit Gods.

Daeromme seide hi ten scaren, die ute ghinghen om ghedoept te werdene van hem: Gheslechte der serpente, wie sal u toenen te vliene van den toe comenden toerne? Daeromme doet werdeghe vrocht der penitencien. Ende en beghent niet te segghene: Wi hebben enen vader Abrahame, want ic segghe u, dat God mechtech es, van desen steennen te verweckene Abrahams kinder. Want te hants es de aex

ghesettet ter wortelen sboems. Daeromme, elc boem, niet makende goede vrocht, sal ute werden ghehouwen ende ghesent in tfier. Ende die sca\ren

[fol. 132v]

vragheden hem segghende: Wat sele wi daeromme doen? Ende antwerdende seidi hen: Die II rocke hevet, gheve den enen dien, die niet en hevet, ende die spise hevet, doe dies gelike. Ende het quamen te hem publicane om ghedoept te werdene ende si seiden te hem: Meester, wat sele wi doen? Ende hi seide te hen: Niet anders dan u ghesettet es, en seldi doen. Ende oec vragheden hem die ridders segghende: Ende wat selen wi doen? Ende hi seide hen: Niemene en seldi verduwen noch op loep doen ende laet u genoeghen met uwen soute.

Ende alse dat volc waende ende peisden in sijn herte van Janne, dat hi ware Cristus, antwerde Jan segghende hen allen: Ic doepe u in den watere, maer een starkere dan ic sal comen na mi, wies ic niet werdech en ben tontbendene siere schoen riemen; hi sal u doepen in den heileghen gheest ende in den viere. Welkes waiere in sine hant, ende hi sal reineghen sinen vloer, ende hi sal gaderen de taruwe in sine scuere, ende dat caf sal hi verberren in onblusschelec vier.

Ende vele

[fol. 133r]

andere troestinghen ewangelizeerde hi den volke. Ende Herodes tetrarcha, alse hi berespt wert van hem van Herodyaden, sijns brueder wijf, ende van alle den quade dat Herodes dede, ende boven al dit vinc hi Janne ende sloetene in den kerkere.

Ende het es ghesciet, alse al dat volc ghedoept soude werden, ende Ihesus ghedoept was ende beedde, es de hemel ontploken, ende de heileghe gheest quam neder in lichaemleker ghedaenten alse ene duve op hem, ende vanden hemele es ghemaect ene stemme: Du best mijn gheminde sone, in di hevet mi behaget.

Ende hi, Ihesus, was beghennende alse van XXX jaren, alse hi ghewaent wert Josephs sone, die was Hely, die was Mathat, die was Levi, die was Melchi, die was Janne, die was Joseph, die was Mathathye, die was Amos, die was Naum, die was Esly, die was Nagge, die was Mathat, die was Mathathye, die was Semey, die was Joseph, die was Juda, die was Johanna, die was Resa, die

[fol. 133v]

was Zorobabel, die was Salathyel, die was Neri, die was Melchi, die was Addi, die was Chosam, die was Elmadam, die was Her, die was Ihesu, die was Eliezer, die was Zorym, die was Mathat, die was Levi, die was Symeon, die was Juda, die was Joseph, die was Jona, die was Elyachym, die was Melcha, die was Menna, die was Mathatha, die was Nathan, die was David, die was Jesse, die was Obeth, die was Booz, die was Salmon, die was Naason, die was Aminadab, die was Aram, die was Esrom, die was Phares, die was Jude, die was Jacob, die was Ysaac, die was Abrahe, die was Thare, die was Nachor, die was Seruth, die was Ragau, die was Phalech, die was Heber, die was Sale, die was Caynan, die was Arphaxat, die was Sem, die was Noe, die was Lamech, die was Ma\tusale,

[fol. 134r]

die was Enoch, die was Jareth, die was Malaleel, die was Caynam, die was Enos, die was Seth, die was Adam, die was Gods.