|
| |
IX
Ende hi seide hen: Amen segghic u: Want selke sijn van den hier staenden, die de doot niet smaken en selen vore datse sien Gods rike comende in moghentheiden.
Ende na VI daghe nam Ihesus Petere ende Jacoppe ende Janne ende leidese op enen hoghen berch achterwert allene, ende es overfigueret vore hen, ende sine cledere sijn ghemaect scinende ende herde wit alse de snee, hoeghedane de voldere alse witte niet maken en mach op der erden. Ende hen oppenbaerde Helyas met Moysesse ende si waren sprekende met Ihesum. Ende Peter antwerdende seide Ihesum: Rabbi, ons es goet hier sijn,
| |
| |
make wi hier III tabernacule, di enen, Moysi enen, ende Helye enen. Want hi en wiste niet, wat hi segghen soude, want si waren ontset van vresen. Ende ene wolke es ghemaect, hen scaduende, ende ene stemme quam van der wolken, segghende: Dit es mijn alre liefste sone, hem horet. Ende stappans alomme siende en saghense vorwertmeer niemene dan Ihesum allene met hen.
Ende hen nedergaende van den berghe gheboet hi hen, datse niemene vertellen en souden, welke si ghesien hadden, dan alse smenschen sone op verstaen sal sijn vanden doden. Ende si behielden dwoert bi hen, onder vraghende wat dat ware, alse hi op soude verstaen vanden doden. Ende si vragheden hem, segghende: Wat segghen daeromme de scriben ende de Pharisei want Helyas moet tiersten comen? Die hen seide antwerdende: Alse Helyas comen sal ierstwerf, sal hi alle dinc hersetten, ende alsoe ghescreven es in smenschen sone, dat hi vele liden sal ende verdoemt werden sal. Maer ic segghe u want Helyas es comen, ende si daden hem dat si
| |
| |
wouden alsoe van hem ghescreven es.
Ende comende te sinen jongheren sach hi ene grote scare omtrent hen ende de scriben ondervraghende met hen. Ende haesteleke Ihesum siende es al dat volc verwondert ende si ontsaghen hen, ende toeloepende grueten si hem. Ende hi vraghede hen: Wat ondervraghedi onder u? Ende een uter scaren seide antwerdende: Meester, ic brachte minen sone te di, hebbende enen stommen gheest, die hem nederwerpet so waer hi hem begript, ende hi scumet ende cricelt metten tanden ende verdroghet. Ende ic seide dinen jongheren, dat sine ute woerpen, ende si en mochten. Die seide hen antwerdende: O ongheloeveghe gheboerte, hoe langhe salic bi u sijn? Hoe langhe salic u liden? Bringhet dien te mi. Ende si brachtenne. Ende alse hine sach, stappans ontsettenne de gheest ende vallende ter erden wentelde hi scumende. Ende hi vraghede sinen vader: Hoe vele tijds eest, dat hem dit ghesciede? Ende hi seide: Vander kinscheit, ende hi werpet hem dicke in tvier ende in dwater, op dat hine verlore. Maer
| |
| |
ochte ghi moghet, hulpet ons yet, onser ontfaermende. Ende Ihesus seide hem: Eest dattu moghes gheloeven, alle dinc sijn moghelec den gheloevenden. Ende stappans riep de vader dies kinds, met tranen seide hi: Ic gheloeve, Here, hulpet miere ongheloevecheit. Ende alse Ihesus sach de scare toe\loepende, es hi dreighende den onsuveren gheest, hem segghende: Doeve ende stomme gheest, ic ghebiede di: Ganc ute van hem ende voert meer en seldi niet ingaen in hem. Ende roepende ende hem sere meslatende ghinc hi ute van hem. Ende hi es ghemaect alse doot, alsoe datter vele seiden, dat hi doot ware. Ende Ihesus hieffenne op, sine hant houdende, ende hi stont op. Ende alse hi ghegaen was in huus, vragheden hem sine jongheren heimeleke: Waeromme en mochte wine niet ute werpen? Ende hi seide hen: Dat gheslechte en mach in ghenen utegaen dan in bedinghen ende in vastinghen.
Ende van daer ghevaren ghinghen si voert in Galilea, ende hi en wou\de
| |
| |
niemene weten. Ende hi leerde sine jongheren ende seide hen: Smenschen sone sal werden ghelevert in de hande der menschen ende si selenne verslaen, ende verslaghen sal hi dies derdes daghes op verstaen. Ende si en bekinden dat woert niet ende si vreseden hem te vraghene.
Ende si quamen te Capharnaum. Alse die thuus waren, vraghede hi hen: Wat vertrocti inden weghe? Ende si swegen, si hadden seker ghedisputeert in den weghe, welc harre de meerre ware. Ende hersittende riep hi de XII ende seide hen: Soe wie onder u de ierste wilt sijn, hi sal de echterste sijn van allen ende de knecht. Ende nemende een kint, sette hijt in harre middelt. Alse hi dat helsende was, seide hi hen: So wie een van desen kinderen ontfeet in minen name, hi ontfeet mi. Ende so wie mi ontfeet, hi en ontfeet mi niet allene, maer hem, die mi sendde.
Jan antwerde hem segghende: Meester, wi saghen selken, die ons niet en volghet, de duvele ute werpen in dinen name ende wi
| |
| |
verbodent hem. Ende Ihesus seide hem: En willes hem niet verbieden; het en es niemen, die viertuut doet in minen name ende haesteleke qualeke spreken mach van mi. Want die jeghen u niet en es, hi es met u.
Want so wie u drenken ghevet enen kelct couds waters in minen name, want ghi Christi sijt, amen segghe ic u, hi en sal sinen loen niet verliesen.
Ende so wie enen scandelizeert van desen cleinen, die in mi gheloeven, hem ware beter, dat hi omhanghen worde in sinen halse met eens esels laste ende ghewoerpen worde in de see.
Ende eest dat di dine hant scandelizeert, snijdtse af. Di es goet, cranc in te gane in dleven dan II hande hebbende te gane in donblusscheleke hilsche vier, waer hare woerm niet en stervet ende dat vier niet en blusschet. Ende eest dat di dijn voet scandelizeert, slaettenne af. Di es goet, houtende inte gane int eweghe leven dan II voete hebbende ghesendet te werdene in donblus\scheleke
| |
| |
hilsche vier, waer hare woerm niet en stervet ende dat vier niet en blusschet. Eest dat di dine oghe scandelizeert, werptse ute. Di es (goet) losch integane in trike Gods dan II oghen hebbende ghewoerpen te werdene in thilsche vier, waer hare woerm niet en stervet ende dat vier niet en blusschet.
Want elc sal ghesouten werden met viere, ende alle offerande sal ghesouten werden met soute. Sout es goet, ware dat dat sout onghesouten ware, waer in souddi dat cunden? Hebdt sout in u ende hebdt vrede onder u.
|
|
Auteursrechtelijk beschermd