Nieuwe Testament (Zuidnederlandse vertaling)

VIII

In dien daghen anderwerf, alse ene grote scare was met Ihesum ende niet en hadden, datse eten souden, te gadere gheroepen de jongheren seide hi hen: Ic ont faermme over de scare, want siet, si hebben saen III daghe mijns

[fol. 101v]

ghebeidet ende si en hebben niet, datse eten, ende eest dat icse late vastende in hare huus, si ghebreken in den weghe, want selke ute hen sijn van verren comen. Ende de jongheren antwerden hem: Wanen mochte iemen ghesaden dese van brode in de woestine? Ende hi vraghede hen: Hoe vele brode hebdi? Die seiden: VII. Ende hi gheboet der scaren neder te sittene op der erden. Ende nemende de VII brode, gracie segghende, brachise ende gafse sinen jongheren, dat sise voreleiden, ende si voreleidense der scaren. Ende si hadden lettelken vessche, ende die ghebenedide hi ende hietse hen vorelegghen. Ende si aten ende sijn ghesadet, ende si droegen op datter overbleef van den brocken, VII manden. Ende die gheten hadden, waren alse IV^M menschen ende hi lietse. Ende stappans ghinc hi op in een scep met sinen jongheren ende quam in de dele Dalmanutha.

Ende de Pharisei ghinghen ute ende begonsten te onder vraghene met hem, een teken van den heme\le

[fol. 102r]

soekende van hem, becorende hem. Ende suchtende inden gheeste seide hi: Wat soeket dese gheboerte een teken? Amen segghic u: Deser gheboerten en wert gheen teken ghegheven. Ende hen latende ghinc hi op anderwerf in een scep ende ghinc wech overt vere.

Ende si sijn verghetende broet te nemene ende si en hadden met hen in tscep niet dan een broet. Ende hi gheboet hen, segghende: Siet ende wacht vanden heve der Phariseorum ende van den heve Herodes. Ende si peisden deen ten anderen: Want wi en hebben ghene brode. Dwelke bekinnende Ihesus seide hen: Wat peisdi, dat ghi ghene brode en hebdt? Noch en bekindi niet noch en verstaet? Noch hebdi verblendet uwe herte? Ghi en siet niet, oghen hebbende, ende ghi en horet niet, oren hebbende? Noch ghi en ghedinct niet, welken tijt ic V brode brac in V^M, ende hoe vele (volle) corve van brocken droechdi op? Si seiden hem: XII. Ende wanneer VII brode in IV^M menschen, hoe vele

[fol. 102v]

manden droechdi? Ende si seiden hem: VII. Ende hi seide hen: Hoe en verstadijs noch niet?

Ende si comen te Bethsaydam. Ende si leidden hem toe enen blenden ende baden hem, dat hi dien tasten soude. Ende begrepen de hant dies blendes, leidde hine ute buten der straten, ende ute spuwende in sine oghen ende sine hande gheleghet vraghede hi hem ochte hi yet saghe. Ende besiende seide hi: Ic sie menschen wandelende alse boeme. Daer na leide hi sine hande anderwerf op sine oghen, ende hi began te siene, ende hi es weder ghegheven alsoe dat hi alle dinc claerleke saghe. Ende hi sendde dien in sijn huus, segghende: Ganc in dijn huus ende eest dattu inghees in de strate, en segghets niemene.

Ende Ihesus ghinc in ende sine jongheren inde castele Cezaree Philippi, ende aldaer vraghede hi sinen jongeren, hen segghende: Wien segghen mi de menschen sijnde? Die andwerden hem, segghende: De andere Janne Baptisten, de andere Helyam, maer de andere alse enen vanden propheten.

[fol. 103r]

Doe seide hi hen: Maer ghi, wien segdi mi sijnde? Peter seide hem antwerdende: Du best Christus. Ende hi esse dreighende, dat sijt niemene en souden segghen van hem, ende began hen te leerne, hoe smenschen sone behoeret vele te lidene ende wederproevet te werdene van den oversten priesteren ende van den oudsten ende vanden scriben, ende ghedodet te werdene ende na III daghe op te verstane. Ende hi sprac dwoert oppenbare. Ende Peter, hem ghegripende, began hem te sceldene. Die ommeghekeret sach sine jongheren [ende] es Petre dreighende, segghende: Ganc achter mi, sathanas, want du en smaecs niet die dinc, de welke Gods sijn, maer welke der menschen sijn.

Ende ene grote scare gheroepen met sinen jongheren seide hi hen: So wie mi volghen wilt, verloechene sijns selves ende drage sijn cruce ende volghe mi. Want die sine siele wilt behouden maken, salse verliesen, ende die sine siele verlieset omme mi ende om de ewangelie, hi salse behouden ma\ken.

[fol. 103v]

Want wat vromet den mensche ochte hi al de werelt wonne ende doet siere sielen argheringhe? Ochte welke verwandelinghe sal de mensche gheven vore sine siele? Want die mi beliende ware ende mine woerde in dese hoerdoemeghe ende sondeghe geboerte, ende smenschen sone sal hem belien, alse hi comt in de glorie sijns vader met sinen inghelen.