|
| |
VI
Ende uteghegaen van daer ghinc hi in sijn vaderlant, ende sine jongheren volgheden hem.
Ende ghemaect den sabbato, began hi te leerne in de synagoge. Ende vele horende verwonderden in siere leringhen, segghende: Wanen comen desen alle dese ende welc es de wijsheit die hem ghegheven es, ende dusghedane viertute die ghewracht werden overmids sine hande? En es dese niet de smet, Marien sone, de brueder Jacops ende Josephs ende Judas ende Symons? En sijn sine sustere hier met ons niet? Ende si worden ghescandelizeert in hem. Ende Ihesus seide hen: Want de pro\phete
| |
| |
en es niet sonder ere, het en si in sinen vaderlande ende in sine maechscap ende in sijn huus. Ende hi en mochte daer ghene viertuut doen dan dat hi lettel sieke ghenas, sine hant daer op gheleghet. Ende hi verwonderde omme hare ongheloevecheit.
Ende hi ommeghinc de castele inden ommeringhe lerende.
Ende hi riep de XII ende began hen te sendene twee te gadere ende gaf hen moghentheit der onsuverre gheeste ende gheboet hen, datse niet draghen en souden in den weghe dan allene ene roede, noch tessche, noch broet, noch eer inden gurdelen, maer ghescoeit met solen ende niet ghecledet werden met II rocken. Ende hi seide hen: So waer ghi ingaet in een huus, daer blivet, tote dat ghi utegaet van daer. Ende so wie u niet en ontfeet noch u en horet, utegaende van daer scuddet af de moude van uwen voeten, hen in ghetughe.
Ende si predecten utegaende, datse doen souden penitencie. Ende si worpen
| |
| |
ute vele duvele ende si salveden vele evele met olien ende si worden ghenesen.
Ende de coninc Herodes hoerde, want sijn name oppenbare es ghemaect, ende hi seide: Want Jan Baptiste es opverstaen vanden doden ende daeromme werden viertute ghewracht in hem. Ende andere seiden: Want het es Helyas. Maer andere seiden: Want het es een prophete alse een uten propheten. Dwelke Herodes horende seide: Dese Jan, welken ic onthovede, es opverstaen vanden doden. Ende hi, Herodes, sendde ende hielt Janne ende bant hem in den kerkere omme Herodiaden Philips wijf sijns brueder, want hi hadse ontleidet. Want Jan seide Herodesse: Di en es niet gheorlovet te hebbene dijns brueder wijf. Ende Herodyas dede laghen om hem ende woudene doden, ende si en mochte. Ende Herodes ontsach Janne, wetende hem enen gherechten man ende enen heilegen, ende hi hoeddene, ende hi wrachte vele, hem horende, ende hi hoerde hem gherne. Ende alse quam een behoerlec dach in siere gheboer\ten,
| |
| |
maecte Herodes enen eten tijt den princen ende den rentmeesters ende den vorsten van Galilea. Ende alse Herodyadis dochter in ghinc ende spranc ende behaghede Herodesse ende den ghenen, die met hem aten, seide de coninc der joncvrouwen: Eyschet van mi wat du wils ende ic saelt di gheven. Ende hi swoert hare: Want so wat du eysches, salic di geven, al waert de helecht mijns rikes. De welke, alse si ute ghinc, seide si harre moeder: Wat salic eyschen? Ende si seide: Jan Baptists hoet. Ende alse si inghinc met haesten ten coninc, yesch si stappans segghende: Ic wille, dat ghi mi volleke ghevet in ene platele Jan Baptistes hoet. Ende de coninc es bedroevet, omme dat gheswoerne recht ende omme de met etende hi en woudse niet bedroeven. Maer ghesendet spiculatore geboet hi te bringhene Jan Baptistes hoet. Ende hi onthoetdene in den kerkere ende brachte sijn hoet in ene platele ende gaf dat der joncvrouwen ende de joncvrouwe gaeft
| |
| |
harre moeder. Dwelke ghehoret sine jongheren quamense ende droeghen wech sinen lichame ende leidenne in een graf.
Ende de apostelen te gadere comende te Ihesum herboedscaepten si hem alle dinc de welke si ghedaen hadden ende gheleert. Ende hi seide hen: Comt achter wert in de woeste stat, rustet een lettel. Want die quamen ende weder ghinghen, waren vele ende si en hadden niet de spacie te etene. Ende opgaende in een scep voerense wech in de stat achter wert. Ende si sagense wech varende ende vele bekindent, ende de voetgangheren van allen staden liepen derwert ende vorequamense.
Ende Ihesus utegaende sach vele scaren ende es ontfaermt op hen, want si waren alse scape, ghenen herde hebbende, ende hi began hen vele te lerene.
Ende alse saen vele uren werden souden, quamen sine jongheren, segghende: De stat es hier woeste ende de ure overlidet
| |
| |
saen. Laetse, op datse gaende in de naeste doerpe ende weghe hen spise copen diese eten. Ende hi seide hen antwerdende: Ghevet hen ghi tetene. Ende si seiden hem: Selewi copen gaende broet om CC deniers ende ghevent hen tetene? Ende hi seide hen: Hoe vele broede hebdi? Gaet ende besiets. Ende alse sijt bekinden, seidense: V ende II vessche. Ende hi gheboet hen, datsise alle daden neder sitten na contubernya op groene hoey. Ende si saten neder in delen met C ende L. Ende ghenomen de V broede ende de II vessche in siende in den hemel ghebenedide hise ende brac de broede ende gafse sinen jongheren, datsise vore hen legghen souden, ende de II vessche deilde hi hen allen. Ende si aten alle ende sijn ghesadet. Ende si droeghen op de blevelinghe der crumen, XII volle corve, ende vanden vesschen. Ende die aten, waren VM manne.
Ende stappans dwanc hi sine jongheren op te ga\ne
| |
| |
in een scep, datse vore hem voeren overtvere te Bethsaydam, tote dat hi dat volc laten soude. Ende alse hise liet, ghinc hi in den berch beden. Ende alst avont was, was dat scep in midden de see, ende hi allene inder erden. Ende hi sachse aerbeiten in riemene, want de went was hen contrarie. Ende omtrent de vierde wakinghe der nacht quam hi te hen wandelende op de see, ende hi woudese voreliden. Ende alse sine saghen op de see wandelen, waendense, dat een onghehier ware ende si riepen. Want si saghenne alle ende sijn gheturbeert. Ende stappans es hi met hen sprekende ende seide hen: Gheloevet, want ic beent, en wilt u niet vresen. Ende hi ghinc op te hen in tscep ende de went cesceerde. Ende si wonderden hen binnen hen vele meer, want si en verstonden niet van den broeden, want hare herte was verblendet.
Ende alse si overvoeren, quamense in dlant van Genezareth, ende si havenden. Ende alse si ute ghegaen waren van den scepe, bekinden si
| |
| |
hem haesteleke, ende doreloepende al dat conincrike begonstense toe te bringhenne in den bedden die qualeke hadden, daer si hoerden dat hi was. Ende so waer hi inghinc in weghe ochte in doerpe ochte in stade, leidense de sieke in de straten ende baden hem, datse doch tasten souden de vesen van sinen clede. Ende hoe vele datse tasten, die worden behouden.
|
|
Auteursrechtelijk beschermd