Nieuwe Testament (Zuidnederlandse vertaling)

IV

Ende anderwerf began Ihesus te leerne ter see. Ende te hem es vergadert ene grote scare, alsoe dat hi opgaende in een scep sat in de see, ende alde scare was omtrent de see op der erden. Ende hi lerese vele in parabolen, ende in siere leringhen seide hi hen: Horet. Siet, hi ghinc ute saeyende te saeyene. Ende alse hi

[fol. 91r]

saeyde, viel dat ander neven den wech, ende de voghele shemels quamen ende aten dat. Maer dat ander viel opt steenachteghe, daert niet vele erden en hadde, ende stappans eest uteghegaen, want en hadde niet hoecheit der erden. Ende alst ute ghegaen es, verhittet de sonne, ende daeromme, want niet en hadde wortele, verdroghet. Ende dat ander viel in doerne ende de doerne ghinghen op ende versmachten dat ende het en gaf ghene vrocht. Ende dat ander viel in goede erde ende gaf vrocht opgaende ende wassende, ende dat een brachte dertechvoldeghe ende een sestechvoldeghe ende een hondertvoldeghe. Ende hi seide: Die oren te hoerne hevet, hore.

Ende alse hi sonderlinghe was, vragheden hem die XII, die met hem waren, te ontbendene de parabole. Ende hi seide hen: U es ghegheven te wetene misterium dies rike Gods ende hen, die buten sijn, werden alle in parabolen, op datse siende sien ende niet en sien, ende horende horen ende niet en verstaen, datse niet bekeret en werden ende icse ghenase ende hen de sonden

[fol. 91v]

worden verlaten.

Ende hi seide hen: En wetti dese parabole niet, ende hoe seldi bekinnen alle parabolen? Die saeyt, hi saeit dwoert. Ende die sijn neven den wech, daer dwoert ghesaeit werdet, ende alse sijt ghehoret hebben, comt sathanas haesteleke ende nemet dwoert af, dat ghesaeit es in haren herten. Ende dese sijn ghelikeleke die opt steenachteghe werden ghesaeit, die alse si ghehoert hebben dwoert, ontfaen sijt stappans met bliscapen. Ende si en hebben ghene wortele in hen, maer si sijn tijtleke; daer na opgaende tribulatie ende persecucie overmids dwoert, werden si haesteleke ghescandelizeert. Ende andere sijn, die in doernen werden ghesaeit: dat sijn dese, die dwoert horen, ende doeghen der werelt ende de bedriechlecheiden der rijcheide ende omtrent anderen begherlecheiden ingaende versmachten dwoert, ende wert ghemaect sonder vrocht. Ende dese sijn, die op de goede erde ghesaeit sijn, die dwoert horen ende ontfaent ende vrochtbaer werden, een dertech\voldech

[fol. 92r]

ende een sestechvoldech ende een hondertvoldech.

Ende hi seide hen: De lanterne en es niet comen, op datse gheset werde onder de mate ochte onder den bedde. Want niet en es iet verborghen, dat niet gheoppenbaert en werdet, noch en es ghedaen in theimeleke, dat int oppenbare niet en comt. So wie hevet oren te hoerne, hore.

Ende hi seide hen: Siet, wat ghi horet. In welkere maten ghi metende sijt, werdet u weder ghemeten, ende u werdet toeghewoerpen. Want die hevet, hem werdet ghegheven; ende die niet en hevet, dat hi hevet werdet af ghenomen van hem.

Ende hi seide: Alsoe eest rike Gods alse ochte een mensche saet woerpe in de erde, ende hi sliepe ende op steet snachtes ende sdaghes, ende dat saet groeit ende in wast als de ghene niet en weet. Want de erde bringhet vrocht willechleke, tierst dat cruut, daer na de are, daer na volle vrocht in de are. Ende alse hare de vrocht voert\bringhet, stect hi stappans de seke\le

[fol. 92v]

in, want de oechst es jeghewerdech.

Ende hi seide: Wien sele wi gheliken Gods rike ochte welker parabolen sele wi dit conpareren? Alsoe een senps saet, dat alst ghesaeit wert in der erden, menre es allen saden, die in de erde sijn, ende alst gheboren werdet, gheet op in enen boem ende wert meerre allen waermoesen, ende maect grote telghere, alsoe dat de voghele dies hemels moghen woenen onder siere scaduwen.

Ende dusghedaenre parabolen sprac hi hen vele, alsoe si dwoert mochten horen, ende sonder parabolen en sprac hi hen niet, maer achterwert leerde hi sinen jongheren alle dinc.

Ende seide hen in dien daghe, alst avont was ghemaect: Lide wi over hier jeghen. Ende latende de scare, nemensine alsoe dat hi in enen scepe was, ende andere scepe waren met hem. Ende het es ghemaect groet ongheweder van wende ende de vloede sendden in tscep, alsoe dat tscep vol soude werden. Ende hi was slapende in den scepe opt hoetscutte. Ende si wectenne ende seg\ghen

[fol. 93r]

hem: Meester, di en behoret niet toe, dat wi verderven? Ende opstaende es hi dreighende den went ende seide der see: Swijch, verstomme! Ende de went hielt op ende het es ghemaect harde grote vreedsamheit. Ende hi seide hen: Wat sidi ontsiende? En hebdi noch gheen gheloeve? Ende si vreseden hen in groter vresen ende seiden deen toten anderen: Wie es dese, waendi, want de went ende de see ghehoersamen hem?