Nieuwe Testament (Zuidnederlandse vertaling)

II

Ende na achte daghe ghinc hi in anderwerf in Capharnaum, ende het es ghehoret, dat hi in den huus was. Ende vele quammer te

[fol. 87r]

gadere, alsoe datse niet begrepen en worden noch oec ter dore, ende hi sprac hen dwoert. Ende si quamen te hem, draghende enen ghichtegen, die van hen IV wart ghedraghen. Ende alse sine hem niet toe bringhen en mochten vore de scare, bloettense dat dac, daer hi was, ende openghemaect lietense neder dbedde in welken de ghichteghe lach. Ende alse Ihesus sach hare gheloeve, seidi den ghichteghen: Sone, di werden dine sonden verlaten. Ende aldaer waren selke van den scriben, sittende ende peisende in haren herten: Wat sprect dese aldus? Hi blasphemeert. Wie mach de sonden verlaten het en si allene God? De welke Ihesus stappans bekinde in den heileghen gheeste, want si aldus peisden binnen hen, seidi den ghenen: Wat peisdi alsoe in uwen herten? Wat es lichtere, te segghene den gichteghen: Dine sonden werden di verlaten, ochte te segghene: Stant op, doet wech dijn bedde ende wandele? Ende op dat ghi wet, want smenschen sone macht

[fol. 87v]

hevet in der erden de sunden te verlatene, seidi den ghichteghen: Ic segghe di: Stant op, doet wech dijn bedde ende ganc in dijn huus. Ende stappans stont de ghene op ende nemende op dbedde ghinc hi van daer vore hen allen, alsoe datse alle worden verwonderende ende eerden Gode, segghende: Want aldus en saghe wi noeyt!

Ende anderwerf es hi ute ghegaen ter see ende al de scare quam te hem ende hi leerde hen. Ende alse si vorwertleden, sach hi Levy Alphei sittende ten tolle, ende hi seide hem: Volghet mi. Ende op staende es hi hem ghevolghet.

Ende het es ghesciet, alse hi neder sat in dies gheens huus, aten te gadere vele publicane ende sondaren met Ihesum ende met sinen jongheren, want het wassere vele, die hem volgheden. Ende de scriben ende de Pharisei, siende want hi metten publicanen ende metten sondaren eten soude, seidense sinen jongheren: Waeromme et ende drinct uwe meester metten publicanen ende metten

[fol. 88r]

sonderen? Ihesus dat horende seide hen: De gesonde en hebben niet noet dies medicijns, maer die qualeke hebben. Want icken ben niet comen, te roepene de gherechte, maer de sonderen.

Ende Jans jongheren ende de Pharisei waren vastende ende si comen ende segghen hem: Waeromme vasten Jans jongheren ende der Phariseense, ende dine jongheren en vasten niet? Ende Ihesus seide hen: De sonen der brulochte en moghen niet vasten alse langhe alse de brudegoem met hen es. Hoe vele tijds si den brudegoem hebben met hen, en moghense niet vasten. Maer daghe selen comen, alse de brudegoem wert afgenomen van hen, ende dan selense vasten in dien daghen.

Niemen en toenaeyt enen ouden clede ene toenaeyinghe rudes lakens, anders nemt hi af de nuwe vervullinghe van den ouden ende de score wert meerre. Ende niemen en doet nuwen wijn in oude vate, anders scoerde de wijn de vate ende de wijn wert ute ghegoten ende de vate

[fol. 88v]

selen verderven. Maer nuwen wijn sal werden ghedaen in nuwe vate.

Ende het es ghesciet, alse de Here anderwerf dies saterdaghes wandelde dore coren ende sine jongheren begonsten vore te gane ende te pluckene de are. Ende de Pharisei seiden hem: Sich wat dine jongheren doen tsaterdaghes, de welke niet gheorlovet en sijn. Ende hi seide hen: En laesdi noeit wat David dede, alse hijs noet hadde ende hem hongherde, hi ende die met hem waren? Hoe hi inghinc in thuus Gods onder Abyachar, den prince der priesteren, ende at de brode der vorelegghinghen, de welke niet gheorlovet en was tetene dan allene den priesteren ende hi gafse dien, die met hem waren? Ende hi seide hen: De saterdach es gemaect omme den mensche ende de mensche niet omme den saterdach. Ende alsoe es smenchen sone here oec tsaterdaghes.