Nieuwe Testament (Zuidnederlandse vertaling)

XXVIII

Ende dies avonts sabbati, die lichtede in den iersten sabbati, quam Maria Magda\lene ende de andere Marie besien dat graf. Ende siet, grote beroeringhe der erden es ghemaect, want de inghel ons Heren quam neder vanden hemele ende toegaende herwentelde hi den steen ende sattere boven. Ende sijn anschijn was alse de blixeme ende sine cledere alse de snee. Ende van siere vresen sijn de huederen vervaert ende sijn ghemaect alse dode. Ende de inghel seide den wiven antwerdende: En wilt u ghi niet ontsien, want ic weet, dat ghi Ihesum soeket, die ghecrucet es. Hi en es hier niet, want hi es op ghestaen, alsoe hi seide. Comt ende besiet de stat, daer de Here was gheleghet. Ende gaende volleke segghet sinen jongheren ende Petere, want hi es op ghestaen. Ende

[fol. 83v]

siet, hi sal u vore gaen in Galilea, daer seldi hem sien. Siet, ic hebdt u voerseghet. Ende Maria Magdalene ende de andere Maria ghinghen ute haesteleke vanden grave met vresen ende met groter bliscap, lopende sinen jongheren boetscapen. Ende siet, Ihesus liep hen jeghen, segghende: God houde u! Ende si ghinghen toe ende hielden sine voete ende anebeedden hem. Doe seide hen Ihesus: En wilt u niet ontsien. Gaet, boedscapet minen broederen, datse gaen in Galilea, daer selense mi sien.

De welke, alse si wech waren ghegaen, siet, selke van den hoederen quamen in de stat ende boedscaepten den princen der priesteren alle de welke gheschiet waren. Ende vergadert metten oudsten, raet ghenomen, gavense den ridderen vele gheldes, segghende: Segghet, want sine jongheren quamen snachts ende sijn hem stelende, u slapende. Ende eest dat dit ghehoret werdet vanden rechtere, wi selen hem raden ende selen u seker maken. Ende ghenomen dat gelt

[fol. 84r]

daden si alsoe si waren gheleert.

Ende dit woert es ghemeinlect onder de Joden tote in den daghe van heden.

Ende de elleve jongheren ghinghen in Galilea in den berch, daer hen Ihesus hadde ghesettet. Ende siende hem anebeedden sine, ende selke harre twivelden. Ende toegaende Ihesus es hi hen toe sprekende, segghende: Mi es ghegheven alle moghentheit in den hemel ende inde erde. Daeromme gaende leret alle menschen, hen dopende in den name dies vaders ende dies soens ende dies heilechs gheests, hen lerende te hoedene alle de welke ic u gheboden hebbe. Ende siet, ic ben met u alle daghe toter volbringhinghen der werelt.