Nieuwe Testament (Zuidnederlandse vertaling)

VII

En wilt niet ordelen, ende ghi en werdt niet gheordelet; want in wat ordele gi ordeelt, werdi gheordeelt, ende in welker maten ghi metende waert, werdt u weder ghemeten. Ende wat siestu een ghestubbe in dijns brueder oghe, ende den balke en siestu niet in dine oghe? Ochte hoe gesegstu dinen brueder: Ghedoeghet, brueder,

[fol. 29v]

ic sal ute werpen dat ghestubbe ute uwer oghen, ende sich, in dine oghe es een balke? Ipocrite, werpt tierst den balke ute dijnre oghen, ende dan saltu sien ute te werpene dat ghestubbe van dijns brueder oghe. En wilt niet dat heileghe gheven den honden, noch en legghet uwe margrieten niet vore de verkene, dat sise bi avontueren niet en verterden met haren voeten, ende de honde omme ghekeret u scoren.

Eyschet ende u werdt ghegheven; soeket ende ghi selt venden; cloppet ende u wert op ghedaen. Want elc die eyschet, hi ontfeet; ende die soeket, hi vendet; ende den cloppenden wert op ghedaen. Ochte wie es ute u een mensche, den welken ochte hem sijn sone broet iessche, hine soude hem ghenen steen bieden? Ochte iesche hi hem enen vesch, hine soude hem niet bieden een serpent? Ochte iesche hi hem een ey, hine soude hem niet bieden een scorpioen? Daeromme ochte ghi alse ghi quadien sijt, bekint goede ghichten te ghevenne uwen

[fol. 30r]

sonen: hoe vele meer sal uwe vader die in den hemelen es, goede gaven gheven dien diese hem eyschen.

Daeromme alle dinc de welke ghi wilt dat u de menschen doen, alsoe doet hen ghi, want dit es de wet ende de propheten.

Gaet in dore de inghe porte, want de porte es wijt ende de wech gheruum die leidet ter verlorenheit, ende vele esser die dore hem in gaen. Hoe inghe es de porte ende de wech smal die leidet ten levene, ende letter esser diene venden.

Wacht u vanden valschen propheten, die te u comen in clederen der scape, maer van binnen sijnse roevende wolve. Van haren vrochten seldise bekinnen: sine gaderen doch niet druven van den doernen ochte vighen van destelen? Aldus maect elc goede boem goede vrochte, maer de quade boem maect quade vrochte. De goede boem en mach niet maken quade vrochte, noch de quade boem en mach niet maken goede vrochte. Elc

[fol. 30v]

boem die niet goede vrocht en maect, wert ute ghehouwen ende wert int vier ghewoerpen. Daeromme seldise bekennen ute haren vrochten.

Elc die mi seghet Here, Here, en sal niet in gaen int rike der hemele, maer die den wille doet mijns vader die in den hemel es, hi sal in gaen int rike der hemele. In dien daghe salre vele segghen te mi, Here, Here, en propheteerde wi niet in dinen name, ende in dinen name woerpen wi ute de duvele, ende in dinen name wrachten wi vele viertute? Ende dan sal ic hen belyen: Want noyt en bekindic u; gaet wech van mi die quaetheit werket.

Daeromme elc die dese waerde horet ende diese doet, hi werdt ghelijc enen wise, een man, die sijn huus stichte op den steen, ende de reghen daelde, ende de vloede quamen, ende de wende stoermden ende bliesen op dat huus, ende het en viel niet, want het was ghefondeert op den steen. Ende elc die horet dese waerde mijn ende diese

[fol. 31r]

niet en doet, es ghelijc enen sotten man, die sijn huus op sant stichte, ende de reghen daelde, ende de vloede quamen, ende de wende bliesen ende stoermden op dat huus, ende het viel, ende sijn val was groet.

Ende het es geschiet alse Ihesus dese waerde volbrachte, verwonderden hen de scaren op sine leringhe, want hi wasse lerende alse macht hebbende, ende niet alse hare scriben ende Pharisei.