Nieu groot Amstelredams liedt-boeck
(1605)–Anoniem Nieu groot Amstelredams liedt-boeck–
AuteursrechtvrijInhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden
[pagina 69]
| |
Op de wijse, Alst begint.Schoon lief wilt my ontfarmen,
Doort bidden en karmen
Dan my ick segt u bloot
In u snee witter armen,
Soo wilt my doch verwarmen
Schoon lief eer ick blijf doot
En laet my nv doch wesen, uwen dienaer gepresen
En kiest voor my gheen aer
So sal ic corts na desen, leven sonder vresen
In dese nieuwe Iaer.
En wilt my niet verlaten
Maer wilt compassi vaten nv en tot aller tijt
En comt schoon lief te baten
Die u zeer boven maten bemint in swerelts crijt
Oft anders sal ic sterven, ist dat ic nu moet derven
V schoon ghesicht voorwaer
Die doot sal ick beerven
Mach ick gheen troost verwerven
In dese nieuwe Iaer.
My dunckt ick mach wel claghen
Nv en tot allen dagen, dat ick dus ben verspiet
In wien ic heb behagen, my nv aldus gaet plaghen
Met lijden en verdriet
En dat deur nijders treken
Die niet doen dan quaet spreken
Van my al teghens haer
Waer deur mijn hart wilt breken
En roep om troost met smeken
In desen nieuwen Iaer.
Oorlof Princesse schoone
Boven al spant ghy die croone
Hier in dees werelt wijt, Vwen dienars ydoone
Schenckt hem in deuchden loone
Die u bemint altijt
En laet de nijders varen // seer ver van ons verharen
Die ons benyden gaer
Maer wilt my by u paren so sal mijn vreucht verclaren
In dese nieuwe Iaer.
|
|