Nieu groot Amstelredams liedt-boeck
(1605)–Anoniem Nieu groot Amstelredams liedt-boeck–
AuteursrechtvrijInhoudende Alderhande Tafel, May, ende andere Amoureuse Liedekens seer vermaeckelijck voor alle Ionge Lieden
Op de wijse: De lustelijcke Mey.Aensiet schoon lief u dienaer minioot
Die om u lief alleyne
Hem u over draecht int cleyn en groot
Tot uwer liefden reyne.
| |
[pagina 68]
| |
En v bemint seer soet, Als hy sich selven doet
Om met u lief te pare, In dese niewe Iare.
Eerlick versoeckt begheert en mint
V zijn lief hooch ghepresen
Als een Hovenier die alle cruyden kint
V wt vele heeft ghelesen
So ghy niet zijt te schoon, voor sulc een slecht persoon
Laet spruyten der liefden aere, In dese, etc.
Cierlijck bequaem vol reden nut
Heb ick u lief bevonden,
Wijsheyts fonteyne een vloeyende put
Ken ick u tallen stonden
Die vrede hebt int hart, en twist verjaecht seer vart
Die thoont ghy voor en nare,
In dese nieuwe Iare.
Helena schoon ick niet en acht
Noch Lucretia wijdt van fame
Nae Veneris aert ghy niet en tracht
Maer zijt veel meer bequame
V naem en eerbaerheyt
Sich veel wijder verspreyt
Als een licht schijnende clare, In dese, etc.
Ghelucksalich is dien voor Godt
Die sulcken deel heeft vercreghen
Tot sijn deel oft rechte lot
Vreest den Heere op alle weghen
Al waer ghy gaet of staet, hem nimmermeer verlaet
Maer hoet voor tbesware, In dese, etc.
En gheeft sijn zeghen met overvloet
Die op sijn paden treden
Als lief met liefde wert ghevoedt
En leven met trou in vreden
Versmaden alle twist, haten des vyants list
Spijt ons nijders te gare, In desen niewe.
Neemt reyn Princes in danck dit liet
Wilt op goe ionste letten
Eer op die wil dan wercken siet
Schout rechte liefde te verpletten
Maer thoont met alle vlijt, dat ghy liefd’ en vreden zijt
Als u lief openbare, In desen nieuwe Iare.
|
|