Een nieu Guese liede boecxken

Corts daer na, als desen aenslach geeyndicht was, heeft de Heere van Lume dit oorlof Liedeken gemaect ende int vertrecken laten wtgaen.

Een Liedt des Welgeboren Edelen Heeren ende Grauen vander Marc, Vry Heere van Lume, etc.

Op de wijse, Wilhelmus van Nassouwe.

Tfy v ghy Afgodisten
Die Gods Raet wederstaen:
Ja meer met den Papisten
Dan met t'Princen graen:
Dunckt v niet Godt sal wreken,
En brenghen aen den dach,
V valsche loose treken,
V naect eewich gheclach.

Schaemt v het boos hantieren,
Ghy Hypocrijten quaet,
V loghenen versieren,
En sidt in des Lants Raedt:
Gheueynst zijn v Raedtslaghen
Ghy Achitophels Bloet,
Ghy sult als Aman beclaghen
De boosheyt die ghy doet.

Ghy soect des Grauen leuen,
Op dat ghy sout te bet

[fol. 87r]

 

De Landen bringhen in sneuen

 

Door v trouloos opset:

 

End hebt den Prins ghesworen,

 

maer uwen Eedt is vals,

 

Ghy soect den Edelen gheboren

 

Te brenghen om den hals.

 

 

 

Ghy sidt als Pontentaten

 

Jn des Lants Regiment:

 

Maer Monicken, Papen, Prelaten

 

Maken v siende blent:

 

daerom zijt ghy Partije

 

den cloecken Graue, maer

 

Al v Verraderije

 

sal comen noch openbaer.

 

 

 

Ghy hebt het Landt tot schanden

 

Den Alff ghepresenteert

 

Te leueren in zijn handen,

 

sulcks was ghepractiseert:

 

daerom quam hy ghevloghen

 

Naer Haerlem, soot wel scheen,

 

daer was de Prins bedroghen

 

Van bouen tot beneen.

 

 

 

Ghy zijt het lant seer schadich

 

Tis iammer dat ghy leeft,

 

den Prins end Graue ghenadich,

 

met al die hem aencleeft

 

dacht ghy toch al warachtich,

 

Ter Vleeschbanck hebben gebracht:

 

Maer Godt die HEER almachtich

 

Heeft voor ons wel ghewacht.

 

 

[fol. 87v]

 

Waer uwen dienst ghetrouwe,

 

Soomen van sulcken leest:

 

Graef Lodewijck van Nassouwe

 

Waer lang int Lant gheweest,

 

Den Duck met zijn Bloethonden

 

En hadde niet geschilt:

 

Waerdy ghetrou ghevonden,

 

Het lant waer al ghestilt.

 

 

 

Ghy bindt v seluen strecken

 

Daer ghy in vallen sult:

 

Hy sal v quaet ontdecken

 

Wanneer den tijdt vervult:

 

Ghy sult v noch voor hem schamen,

 

Laet hem comen int parck,

 

Den Edelen Heer van Namen,

 

Den Graue vander Marck.

 

 

 

Daerom Edel Heer verheuen

 

Schaft eenen goeden moet:

 

Godt sal sparen v leven,

 

Spijt v vyanden verwoet:

 

En sal v sterckheyt gheuen,

 

Door zijn ghenade groot,

 

Op dat door v beseuen,

 

Wy comen wt der noot.

 

 

 

Al was Dauid verdreuen

 

Door Sauls hooghen moet:

 

Nochtans sachmen tlot keeren

 

Dewelcke lach onder voet:

 

Soo sullen sy oock beclaghen,

 

Aenmerckt wel mijn vermaen,

[fol. 88r]

 

Dat zijt dorsten ghewaghen

 

V Edelheyt te vaen.

 

 

 

Sy hebben veel quaets ghebrouwen

 

Door haer geueynstheyt groot:

 

Oock Mannen ende Vrouwen

 

Ghebracht in lijden groot:

 

Eer t Lant sal sijn in vreden

 

Tsal costen menighen Man:

 

Daerom met ons ghebeden

 

Laet ons Godt roepen an.

 

 

 

Bidt voor den wel ghesenden

 

Prince seer vermaert,

 

En Heeren in alle enden

 

Daer Gods Woort wort verclaert.

 

Den Graef vander Marck ydoone,

 

Den Palsgraef op den Rijn:

 

Voor Enghelant die Croone

 

Mach wel ghebeden zijn.

Den 5. Junij 1574.