Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse van Harlinghen.Vvie wil hooren een goet nieu Liet,
Al watter op Pinxterdach is gheschiet
Hoort toe ick salt v singhen,
Al van die Papouwen, hoort mijn bediet
Noorthollant meynden sy te dwingen.
Sy quamen te Wormer of daer ontrent
Die Boeren van Assendelft maecten haer wel bekent,
Die Geusen lietent haer oock genieten,
Sy cregen daer oock een Pinxterbloem,
Om gracy wast dat sy riepen.
Tiete Hettinck als een vroom Hoopman
Hy voerde zijn knechten so dapper an:
Allarm sloegen die Tromelen,
Die vrijbuyters quamen oock stoutelick aen
Sy bleuen daer al die niet ontswommen.
Wat batet daer v groote cracht,
Die ghy Amsterdammers hadt by den anderen gebracht,
Veertien hondert Papouwen wilt hooren,
Godt toende daer zijn groote macht,
| |
[Folio 86r]
| |
Papou gaft daer al verlooren.
Vijftien aenslagen hadden sy ghemaect,
Sy waren oock te Purmurent gheraect,
Sy meynden twas al ghewonnen,
Die Galeyen schoten daer so dapper in,
Seer weynich diet ontspronghen.
Achtentachtentich Vrijbuyters voorwaer gheseyt,
Die hebben daer weer neergheleyt
Meer als ses hondert bloethonden wilt horen
En noch wel tweehondert tneghentich bekent,
Ghebrocht al binnen Horen.
Godt toonde daer zijn wonderwerck,
Door zijn crachtighe handt seer sterck,
Somen te Ulpendam mocht aenschouwen
Die Galeyen schoten daer oock int perck,
Papou quam int benouwen.
Vier hondert te Ulpendam bleuen doot,
Die sy begraefden al in de sloot,
Sy creghen te Amsterdam nieuwe maren,
Hoe dat sy te Purmurent bloot
Ende te Wormer waren gevaren.
Ons Amirael seer wijs bedacht,
Die was daer haestelijck by ghebracht,
Door die verradersche tongen,
Dan het is hem vergaen seer sacht,
Den dans is hy ontspronghen.
Oorlof ghy Heeren op dit termijn,
Wilt onsen Prince ghetrouwe zijn,
| |
[Folio 86v]
| |
Ende ghy Capeteynen by desen,
Laet ons trecken eene Lijn,
Godt sal ons hulper wesen.
|
|