Nieu Aemstelredams Liedboek

Op de wijse, Lief wtvercoren, etc.

VAn achtentachtich, Het nieuwe Jaer
Dat is waerachtich, Heel wonderbaer
Diet can ghelooven, Het sal gheschien
Dat blinde dooven, Hooren noch sien,
En t'isser gheseyt, Dat menighe Meyt
Sonder bescheyt, Sal nae een vryer vlien.

Dus weest vry vrolijc, Ghy knaepkens eel

Oft bent ghy een molic, T'is even veel,
Men sal v vryen, Om t'groote goet,
En oock somtijen, Om hooghe moet,
Dus houdt v wat fris, T'gheluck is onwis
Waer datse noch is, Die't lach betalen moet.

[fol. 118]

 

Wy consenteren, De Meyskens schu,

 

Dat sy't met eeren, Gaen vraghen nu,

 

En moghen vryen, Wie dat haer lust

 

Wil hy't niet lijen, Dat sy hem kust,

 

So blijft hy in schant, Die onachtbaer quant,

 

En crijcht in't lant, Geen lief die by hem rust.

 

Princesse schoone, T'is nu v beurt,

 

Schenct hem de croone, daert hart om treurt

 

Het moet doch wesen, Dat men bemint,

 

Dus wilt niet vreesen, Wie eerst begint,

 

De liefde en eer, Verachtmen niet meer,

 

Maer maecktse weer, Aen beyde zijden blint.