Nieu Aemstelredams Liedboek


Op de wijse. UVaerom Cupido Godt Dwingt ghy het harte mijn, Dat ic door v gebot, brand' met hartseer en pijn En soect t'allen termijn Een Goddin schoon ghedaen Die my met valschen schijn Gantschelijck gaet versmaen.
[Folio 117]
Mijn druck benautheyt smart, Mijn lijden en verdriet Beweecht niet eens haer hart, Noch ten vermorwt haer niet Als haer die weet gheschiet, Dat ick sterf door onmacht En sy mijn lijen siet, Verblijt, sy daerom lacht. Als een leeuw grimmich fel, Den roof voor hem neer leyt, Die hy stracx daer nae sel // Verscheuren met wreetheyt Wert beroert soo men seyt Met medoogen terstont, So dat ooc t'wreede feyt Zijn wreedich hart doorwont. Mijn laes, mijn Goddin Lief, Is anders ghenatureert, Hoe ic lijde meer grief, Hoe sy meer glorieert, Hoet hart hem meer verneert Haer te dienen ghetrou // Hoe sy nu meer vermeert Mijn hartseer druck en rou. Maer Liefs liefde blent Dwingt mijn hart en ghemoet, Dat ick dees Goddin jent // Bemin oock in onspoet Gheen hartseer, suer noch soet Sal veranderen mijn sin, Want haer schoonheyt die doet Dat ick haer dus bemin. Dies o versuchten heet // Oock mijn hart seer benout Doet mijn lief weer de weet, Dat ick by nae verstout, Siet dat ghy haer hart cout Verwarmt door v vyer groot, Versoeckt met moede stout Ghenade of de doot.