Nieu Aemstelredams Liedboek

[fol. 112]

Tafel-Liedt, Op de wijse: Die Nachtegael die sanck een Liedt, etc.

TSa maect jolijt // wie dat ghy zijt,
In deser feest // Weest hier verblijt
T'is nu den tijt, minst ende meest,
Wilt vreucht end' triumpheren // vermeeren
Bedrijft solaes // met soet geraes
Dees Vrijsters teer ter eeren.

Elc toont nu vreucht, gebruyct zijn jeucht

Dewijl hy mach, Met soet gheneucht,
Dient lief in deucht, in dit ghelach,
Wilt vrolijck jubileren // als heeren
Met lieflijck singhen, den tijt voortbringhen
Dees Vrijsters teer ter eeren.

Drinckt onbelaen, Ghy siet her staen

Veel kroesgens ront, Met edelen traen,
Om dorst verslaen // set aen v mondt,
Wilt droefheyt van v keeren // en weeren,
Wilt jocken en spelen, singhen en quelen,
Dees Vrijsters teer ter eeren.

Prins maect goet chier, Want wijn en bier

Is hier van als, Met soet ghetier,
Een vriendelijck dier, Valt om den hals,
Steelt soentgens sonder proncken,
Wilt loncken, Die dat begint, en eerst verwint
Die is een croes gheschoncken.