Nieu Aemstelredams Liedboek

Op de wijse: Ick lije in't hart pijn ongewoon.

T'Valt swaer // sonder stadighen hoep
Van troost te winnen // yemandt te minnen
Voorwaer, in desen baen ick loop,
T'vlas moet ic spinnen, t'cost my mijn sinnen
Want die mijn hart begheert, Met liefd' bevangen
Mijn bidden en smeecken weert
Hoer oochskens van my keert,
En soeckt t'verlanghen.

Eertijdt // scheen my Cupidos gonst

Nae mijn behagen // self nae te iaghen,
Verblijt // doch ick door slechte const,
En raet van magen // haer liefd' te draghen.
Maer t'radt is seer verdraeyt,
Nu blijft die ooghen,
Doort schijn ben ick verleyt
Die liefste van my scheyt
Ick ben bedroghen.

Mijn hart // sal ick van haer oprecht

Al eer niet wenden // t'leven sal enden,
Met smart, mach my haer trouwe knecht
En veel ellenden, Venus toesenden,
Ic blijf mijn lief getrou, t'hart sal niet sneven
Al treur ic nu in rou // ic sal dees weerde vrou
Noch niet begheven.

Sy is // mijn vreucht, Mijn troost, mijn hoop

Naest God mijn Heere, die ic begeere,
Ghewis // om dees Princes ick loop,
Ende t'bloet verteere, t'neemt eens een keere
So sou ick my t'geluck // gheheel toeschrijven
Verwerpen t'sware juck,
Bevrijdt van pijn en druck,
Ghenuecht bedrijven.