Nieu Aemstelredams Liedboek

Op de wijse: Schoon lief ghy zijt mijn troost alleyne.

PEynst om my schoon Lief ghepresen
In mijn hart staet ghy gheprent, etc.
Eerbaer en schoon zijt ghy van wesen
Ter Weerelt gheen soo jent,
Eerlijck en pertinent
Zijt ghy schoon bloem verheven,
Wilt my schoon lief doch eens troost gheven,
Haest liefken comt my beneven.

En dan so mach ick vreucht vermeeren

Reyn wtvercoren greyn, etc.
Recht als een die met aller eeren
Eens is vertroost certeyn
Om v schoon bloem alleyn
Staet alle mijn betrouwen,
Soete lief aen my, wilt v doch houwen, etc.
Ontgaen moet dan alle mijn rouwen.

Om v schoon lief is alle mijn jaghen

Niemant dan ghy voorwaer, etc.
Van schoonheyt my soo sal behaghen,
Als ghy sult lief openbaer,
Lief laten wy te gaer,
T'samen eens vreucht oorboren,
Keert v tot my liefken wtvercoren, etc.
Dan soo moet alle mijn druck versmoren.

Noyt gheen Princesse soo fier en schoone

Bemint stont in mijn sin, etc.
Van Venus spant sy ver die Croone,
Reyn lief ick v bemin,
Crijgh' ick v tot ghewin

[fol. 104]

 

Dat my v mach ghebueren,

 

Hey dan heb ick gheen treuren,

 

Bequaem en lieflijck zijt ghy t'aller uren.