Nieu Aemstelredams Liedboek

Op de wijse: Alst begint.

O Smertelijcke minne
Moordadich is v feyt,
Seer soet was v beginne,
Maer als galle bitterheyt
Soo vinde ick v in't eynde
Door mijns liefkens valsch in treyn,
Want sy als de gheschende,
Heeft veracht mijn liefde reyn, heeft, etc.

Eylaes t'moet my mishaghen,

T'fy hoe was ick dus bedacht
Dat ick ginck liefde draghen
Tot haer die my veracht,
Den tijdt mach my wel rouwen
Dat ick haer mijn liefde boot,
Ick vind'se vol ontrouwe
Twelck my sal doen de doot, etc.

Mijn jeucht moet nu verdraghen

Doort onmenschelijck lijden stranck,
Och waerse wt mijn behaghen
Die ick eens mijn liefde schanck,
Mijn lijden sou versoeten
Maer och lacy neen sy niet,
Als sy my comt ontmoeten
Soo lijdt mijn hart verdriet, etc.

Oorlof wel valsche Princesse,

Noemen mach ick v soo wel
Ghy die ontrouwe doet expresse,
Ghy weet bet al doet ghy el,
Seer dubbelt is v wesen, Des ic wel singhen mach
Adieu reyn wtghelesen
Die ick eens te minnen plach, etc.