Nieu Aemstelredams Liedboek

Op de wijse: V liefde quelt my tot der doot.

MEn placht eertijts doort loopen snel
Doort danssen, en lustich springhen,
Doort dienen, smeecken, doort praten soet gherel

[fol. 94]

 

Doort fraey en lieflijck singhen

 

Een moy Meysken te bedinghen.

 

Athalanta werdt doort loopen ras

 

Ghewonnen sonder claghen,

 

Doort praten, singhen, Doort danssen op dit pas

 

Crijght menich zijn behaghen,

 

T'verdriet my noch niet te jaghen.

 

Leander heeft om Hero dick

 

Door Zee gheswommen vaerdich

 

Verwondert v dat een persoon als ick,

 

Namelijck plomp onaerdich,

 

Om v lief gae doolen waerdich.

 

Mocht ick als Jacob v persoon

 

Rachel verdiende winnen,

 

Geen diensten swaer, souden my om dit loon

 

Zijn teghen mijne sinnen,

 

Want v sal ick eeuwich minnen.

 

V wesen schoon, mijn hart behaecht

 

V reden cloeck doet hoopen

 

Ghy sult my schincken, daer ick om heb ghejaecht

 

Daer ick noch moet om loopen,

 

Want v trou can ick niet coopen.

 

Veel gaven zijn in v ghelijck,

 

Pallas verstant en reden,

 

Ghy hebt veel schatten, maer Venus suyverlijck

 

Heeft om soo schoone leden

 

Voor Adonis dick ghebeden.

 

Dat haer behaecht heeft mijn verstant

 

Oock seer ghequest ootmoedich

 

Bid ick Princesse, doet v dienaer bystant,

 

Toont nu v harte goedich,

 

En vertroost v dienaer spoedich.