Nieu Aemstelredams Liedboek

[fol. 86]

Op de wijse: Allemange. Ofte, O Weerelt vol vals behaghen.

LAet my nu troost ontfanghen
Van v met soet verlanghen,
Mijn pijn en swaer verstranghen
Sult ghy nu doen cesseren,
Wilt alle valsche slanghen
De welcke gaen haer ganghen,
Aen v niet laten hangen, maer wiltse van v keeren
Want sy nu rechte voort, Niet soecken dan discoort
Ick woude dat haer die moort
Al sloech sonder confoort,
Soo souden wy vermeeren, En alle vreucht hanteren,
Die nijders gaen verneeren
Met also soeten accoort.

Wilt ghy nu niet genesen, mijn hart benout met vreesen

Soo sal ick corts nae desen
Den doot al moeten smaken,
Want v reyn eerbaer wesen
T'welck moet worden ghepresen,
Dat heb ick wtghelesen,
Hoe sal ick daer aen raken,
Ghy zijt dach ende nacht, Altijt in mijn ghedacht,
Och had ick doch verpacht
Vrou Venus groote cracht, Soo soude ick v genaken
Nae niemant anders haken.
Dus wilt my doch niet laken
Of ick in liefden versmacht.

Mach ick niet deerlijck claghen

Dat ick het pack moet draghen,
Het sal mijn hart doorknaghen
Wilt sy my niet verhooren,
Quaem ic in haer behagen, By nachte oft by daghen
Ick sou noch vreucht ghewaghen,
Maer liefde doet my versmoren
T'is my een groote pijn, Dat ick van haer moet zijn,
Want haer claer aenschijn, Doorstaelt dat harte mijn,
Ghy weet lief van te vooren
Dat ic sou zijn verlooren, En ghy met scharpe spooren
Doorstaeckt het harte mijn.

Princesse lief verheven, Wilt my nu geven t'leven

Want niemant macht my gheven
Dan ghy tot deser stonden,
Tot v werd' ick ghedreven
Door kermen en door beven.

[fol. 87]

 

En laet my doch niet sneven,

 

Maer heelt mijn diepe wonden,

 

Aenhoort doch mijn gheween,

 

Weest niet ghelijck een steen, Want v en anders geen

 

Lief ick in't harte meen,

 

Van v hoort mijn vermonden,

 

Aen v ben ic gebonden, En ghy hebt my verslonden

 

Ghy breeckt mijn hart ontween.