Nieu Aemstelredams Liedboek

Op de wijse: Bedroefde harteken.

GHetrou ghestadich in mijn afwesen
Sal ick v liefken blijven altijdt,
Want boven alle wtghelesen
Ghy alleen de liefste zijt.

Eer ick v Lieveken soude laten

Leed ick liever tormenten groot,
Spijt al de ghene die sulcx haten
Sal ick v beminnen tot der doot.
Een dinc, Lieveken, wild' ick gheern weten,
Welcx twijffel my maeckt torment,
Of ghy Liefken my niet en sult vergheten
Als ick v Lief sal zijn absent.

Reys ick Lieveken wt den lande

Mijn hert altijdt v blijft ontrent,
T'welck ick v laet tot eenen pande,
Ghestadich, ghetrou, tot den ent.

Terwijl ick Lieveken zy wten ooghen,

Wilt doch somtijdts ghedachtich zijn,
T'verdriet en lijen ick moet ghedooghen,
T'scheyden Lief van v is groote pijn.

Van hier reysende houdt ghy ghevangen,

Mijn hart en sin in groot verdriet,
T'weder om keeren is mijn verlanghen,
Eer en verblijd' ick mijn Liefken niet.

Elcx presency moet ick nu derven,

Daerom hebt my Lief, in v ghedacht,
Of die bitter doot soud' ick beerven,
Want altijdt Liefs liefde baert cracht.

Sedert ick Princes sal zijn verloren,

Alle Clappeyen van v scheyt
Laet v niet anders comen ter ooren

[fol. 78]

 

Dan mijn liefd' en ghetrouwicheyt.