Nieu Aemstelredams Liedboek


Een nieu Liedt, Op de wijse: Alst begint. EEn Venus dier, hout my in haer bestier Gheen schoonder macher zijn geboren Haer Amoureusheyt fier, Brengt my in swaer dangier, Mijn sinnekens hebben haer vercoren, Als Aurora siet men haer vertooghen, Ghelijck als een Goutdraet Is haer hayrtgen delicaet, Diamantich zijn haer ooghen, Voorsichtich en wijs, met een soet advijs
[Folio 71]
Soo is mijn liefgen verheven, Ick gheeff haer den prijs, dit bloeyende rijs Dat Venus was toegheschreven Door haer eerbaer opsetten Ghelijck als een albast, zijn haer tandekens gepast Haer aesem ruyscht als violetten. Noch heeft sy voorwaer, Een lichaem dat is claer Veel witter dan de snee doorvloghen Ick en weet aen haer, gans geene maer Venus borsten moet sy hebben ghesoghen Haer tonghe spreeckt rethorijcke Tot lachen staet haer mont, haer borstkens ront Haer keelchen singt musijcke. Als Venus amoreus, en Pallas gracieus En Juno can sy haer versieren Eerbaer en heus, seer familieus Soo zijn mijn soet liefgens manieren Eloquent is sy van spraken, Root als robijn, haer lipkens zijn Sanguijn zijn haere kaken. Prences valiant, als Helena playsant Is suyverlijck van leden Door der liefden brant, seer abundant Heeft Cupido mijn hardt besneden Sal ickse moeten derven, Als Leander creteyn, om Hero reyn Sal ick't moeten besterven.