Nieu Aemstelredams Liedboek

Op de wijse: Den tijdt is hier, etc.

DOet Martis eer // ghy die wilt slaen en vechten,
Ick haet te seer
Het campen met der handt
En die in't Meer,
Oft daer de Schepen hechten,
Wendt v begheert, Neptuo triumphant,
Eert ghy v Heer Ruyters met goet verstant:
Doch ick wil Venus prijsen // v
Gaen Cupido bewijsen // ru,
Eer en lof doen rijsen // nu
Neerstich met offerhandt.

Dient dan oock mijn, Als ick't v heb bewesen

In Liefs aenschijn,
Laet my daer jonst ontfaen,
Rustich en fijn, Werd' ick dan wel ghenesen,
Clachte en pijn
Sal van my haestich gaen,
Schiet v fenijn, Diep in haers hartsen plaen
Op dat ick t'allen daghen // voet,

[fol. 65]

 

Crijghe van die my claghen // doet

 

Hope sal dan iaghen // vroet

 

Terstont druck van de baen.

 

So sullen wy // ist datse my, wil meenen

 

Vrolijck en bly // leven in groot gheneucht

 

Dat loef ick dy // Ick sal v loff verleenen

 

Dat ghy wel my // sult dancken voor mijn deucht

 

Een beeltgen vry

 

Wert van my toegheveucht

 

Dat sal ick t'uwer eeren // koen

 

Op t'outaer te feesteren // spoen,

 

Wilt ghy nu mijn begheeren // doen

 

Dat lief na liefde peucht.

 

Princelijcke cracht // doet mijn Princesse buyghen

 

En haer ghedacht

 

Den hemel niet bespien // Op dat haer macht

 

Gheenen goeden lust mocht suyghen,

 

Maer dat myn clacht,

 

Van haer wert aenghesien

 

Laet uwen schacht,

 

Tot in haer harte vlien

 

Soo sal ick fantasien // veel

 

In my stellen ter syen // heel

 

Singhen met een blye // keel

 

Sal vreucht van my gheschien.