Nieu Aemstelredams Liedboek

Op de wijse: Grand Matresse.

UVellustighe Jonghelingen,
Dit edele Maechdekijn,
Dat wil ick een croesgen bringhen
Met vriendelijck aenschijn,
Een vreuchdelijck Liedeken singhen
Ter eeren de liefste mijn.

Mijn hert houdt sy van rouwen

Dit edele Maechdekijn,
Dus moet ick haer altijdt houwen
Voor mijne Medecijn,
Beminnen oock alle Jonckvrouwen
Ter eeren die liefste mijn.

Dit kroesgen wil ick toedrincken

Dit edele Maechdekijn
Want haer bruyn oochgens blincken
Soo claer als Christalijn,
Wilt elck een croesgen schincken
Ter eeren die liefste mijn.

Sy heeft my heel ghenesen

Dit edele Maechdekijn,
Dus soo ghy hier zit ghelesen
Een yeghelijck by die zijn,
Wilt allegaer vrolijck wesen
Ter eeren die liefste mijn.

Princesse seer fray van gronde

Dit edele Maechdekijn,
Ontfangt dit Bekertgen ronde
Met claren coele Wijn,
Een kusgen aen uwen monde
Ter eeren die liefste mijn.