Nieu Aemstelredams Liedboek


Op de wijse, Dat set ick op mijn handelijn. NV wil ick laten varen Druck lijden wt mijn gemoet En drinken van den claren Die t'herte verheughen doet, Ter eeren die Liefste, die Liefste, die Liefste Ter eeren die alderliefste mijn Met vreuchden, in deuchden Willen wy ionghe Jeuchden By v hier vrolijck zijn. Dit croesken vol gheschoncken, Breng ick een maechdeken fier, Wiens oochskens op my loncken Gants door der minnen bestier Waer voor ic haer ionnen, haer ionnen, haer ionnen Waer voor ick haer ionnen veel vreuchden groot Als huyden // wy luyden
[Folio 26]
In vrolijckheyt beduyden Dat die bedroefden zijn doot. Laet comen Harpen Luyten Fiolen, schalmeyen meest Rederijcken spelen cluyten Van sinnen fray na den gheest Hy salt noch betalen, betalen, betalen Hy salt noch betalen, diet niet en weet Laet sorghen, die borghen Wy scheyden niet voor morghen, Al isset veel nijders leet. Ghesoden en ghebraden Brengt oock ter Tafel laet, Pasteyen, Taerten, Vladen Met allerley sucaet Op dat wy ons lusten, ons lusten, ons lusten, Op dat wy ons lusten, mogen versaen Doet schincken // en drincken Wt schalen die clincken Den edelen Rijnschen traen. Den waert Princelijck vol eeren, Heeft ons met allen nu wel Voldaen: maer zijn begheeren Is dat wy met opstel De liefste eens cussen, eens cussen, eens cussen, Die liefste eens cussen onverfoeyt Want sinnen // die minnen Verwecken doet van binnen Die Liefde in Liefden bloeyt.