Nieu Aemstelredams Liedboek


Op de wijse, Die Nachtegael die sanck een Liet, etc.
[Folio 22]
GHy dochters fray // comt maeckt een ray Met herten coen Ghebruyct de may // vroech ende spay Want sy staet groen Met cruyden soet van roken // ontloken Tot v verdoen, dus wilt v spoen, T'ontfaen den Mey voorsproken. De Mey present t'sy v bekent Staet schoon ontdaen Met bloemkens jent // seer excellent Is hy belaen Dus wilt v nu ten tijden // verblijden Comen ter baen // den Mey t'ontfaen Met v lief aen v zijden. Wilt v nu spoen // in smeys saysoen Met v lief sent En zijn int groen, avont en noen By hem present Loont hem zijn liefde vierich // manierich Blust zijn torment // en groot ellent Als een lief goedertierich. Al met genuecht, keert v tot vreucht Alst die tijt jont En v verheucht, in eer en deucht, Tot aller stont Met v lief wtvercooren // wilt hooren Maeckt hem ghesont // zijn hert ghewont Soo wert hy nieus herbooren. V Lief bemint, dit wel versint, Van herten wel Maer ghy hem vint // blust zijn torment En groot ghequel Wilt v zijnder ontfermen // erbarmen Ontfangt hem snel // met goet opstel, In v snee witter armen.